Agalelei pea Iapani e atinae nuu ma faalapotopotoga

I le 23 o tausaga talu ona faasafua mai e le Malo o Iapani ana fesosoani tupe mo atinae a nuu ma afioaga ma faalapotopotoga tumaoti laiti aemaise lava o atinae e manuia ai tagata o nuu ma afioaga i Samoa, o lea ua silia i le 15 miliona tala Amerika se vaegatupe ua foai mai e lea Malo agalelei o se paaga foi a lo tatou Malo.

Ua tele faleaoga tulagalua i le atunuu ua faatupe i lea fesoasoani a Iapani, o tane vai, o atinae tau faatoaga ma lafumanu e pei o moa ma puaa. O lea foi ua lafoia nisi o nuu i le agalelei o lea Malo e pei ona sainia maliega a Iapani ma Salelologa, o Matautu ma Vaovai i Falealili, faapea Manunu ma le faalapotopotoga tumaoti o le Toomaga mo ē Puapuagatia ua latou maua ai le ta‘i $95,238 tala Amerika poo le $220,000 tala Samoa.

Saunoa le alii Amepasa o lea Malo mo Samoa o Kazumasa Shibuta, e leai lava se isi naunautaiga o lona malo ia maua e tagata o Samoa le ola manuia ma le fiafia e ala i atinae e aoaoina lelei fanau i le lelei o faleaoga ma isi vaega. O le Toomaga o le a tuusa‘o le fesoasoani i le faatupeina o le latou nofoaga tutotonu na faaleagaina i le afā o Eveni ia Tesema 2012.

O se tasi o vaega o le ofisa autu o Leoleo i Apia ua tuuina atu e le Malo mo le Toomaga e le gata e faagaioi ai le ofisa autu ae o le a avea ma nofoaga e tausia ai tina ma tamaitai maitaga e mafua i ni sauaga poo ni faafitauli tau lotoifale o aiga.

Pe a fua i le tele o seleni ua sasaa mai e Iapani mo atinae eseese i Samoa, o loo faapea foi ona fesoasoani lenei Malo i isi atinae tetele e pei o le suavai ma le eletise faapea le fausia o uafu ma vaa laupasese o loo faaaogā nei mo feoaiga i le va o Samoa ma Amerika Samoa faapea le va o Upolu ma Savaii.

I se talanoaga ma le alii Amepasa o Shibuta na ia faaalia ai o le eletise se tasi o atinae e taugata tele mo Samoa ona o loo faaaogāina ai le malosi tau suauu e gaosi ai lea malosiaga. Peitai o lana faamatalaga o le suauu kiso o loo gaosia ai le eletise e sili atu ona faatuatuaina mo le lumanai ona e leai se faaletonu e ui ina taugata.

O atinae o loo maua ai le eletise i isi malosiaga faalenatura e pei o le savili ma le malosi o le la, na ta‘ua e le alii Amepasa e iai lava taimi e faaletonu ai ona a leai se savili ma tau lē maua le malosi o le la ona faaletonu lea.

O le finagalo o le Amepasa i ia atinae ona o lona Malo o loo tu malosi foi i le atinae o le faleeletise i Fiaga lea ua maua uma ai e le tele o Upolu le eletise. O fesoasoani ua maua e afioaga i Savaii ma Upolu o le a faaopoopo i ai ma sao o Salelologa, Matautu ma Vaovai faapea Manunu i le fausia o faleaoga. O lona uiga e iai le sao tau tupe o nei nuu ae lē tele.
 Le amepasa o Iapani Kazumasa Shibuta (ogatotonu) ma sui o afioaga o Salelologa le afioga Sili Brown (itu agavale) ma le afioga i le Faipule o Falealili, Tusa Misi Tupuola ina ua mae‘a sainia maliega o le a tuuina atu ai fesoasoani tupe mo ia afioaga e toe faaleleia ma fausia ai faleaoga tulagalua

Le amepasa o Iapani i le ogatotonu ma le sui o le Komiti a le aoga tulagalua a Manunu le susuga Manutufatufa Asafo itu taumatau ma le Pelesetene o le Toomaga le afioga Siliniu Lina Chang