Faauuga a le Ia Malamalama Agape Bible College i Aukilani

E 26 le aofaiga o i latou sa faamanuiaina lo latou taumafai i le tausaga lua ma le tausaga fā i le Aoga Tusi Paia o le Ia Malamalama Agape Bible College i le Aso Toonai ua mavae, 1 o Novema i le hall a Samani Pulepule i Magele.

O lea faauuga o loo aofia ai nisi o susuga i faafeagaiga, o faletua, o tamā faapea tama ma teine talavou. O le tausaga lua e 15 le aufaauu ma le tausaga fā e 11, ma o le fā ai nei o tausaga talu ona faagasolo lenei faauuga.

O le faamoemoe autu ma le sini o loo taumafai i ai lenei aoga o le faalauteleina o le malamalama ma le saili loloto o le iloa o le Afioga Paia a le Atua auā le faaaogāina i totonu o Eakalesia o loo galulue ai. E eseese uma Ekalesia o loo iai o latou sui i totonu o lenei aoga.

O le susuga i le faafeagaiga ia Charles Reed sa fai ma tootoo o le aso na te faagasoloina le polokalame ma o ia foi o le pule aoga a lenei Kolisi. E silia i le 300 tagata sa auai e molimau le tufatufaina o tusipasi o i latou ua faamanuiaina.

O susuga i faafeagaiga ma o latou faletua, o mātua ma aiga faapea uo ma ē masani sa faatasi atu i ai. O le aufaipese a le Prince of Peace i Magele sa latou peseina viiga o le Atua, ae o le susuga i le faafeagaiga ia Rev Tafunai na saunia le tatalo e tatala aloaia ai le polokalame.

O Pastor Matafala Lesa na fofogaina le isi tatalo ina ua mae‘a le viiga, ma ao ai loa ma le taulaga. O le tamaitai ia Lizzie Tuigamala, o ia lea ua sili i le tausaga lua i le mataupu o le Associates of Theology, sa fai ma sui o lana vasega e momoli le latou faafetai i faiaoga ma le tapuaiga a mātua ona ua faaiuina ma le manuia le tausinioga o lenei tausaga.

O Nimo Meleisea ua avea le tulaga muamua o le tausaga fā i le mataupu o le Bachelors of Theology, sa faapea foi ona faaleo lona agaga fiafia i le tapuaiga a faafeagaiga ma ekalesia eseese aemaise o aiga sa pati taoto le tapuaiga lea ua a‘e manuia ai le faatamasoaliiiga sa alo atu i ai.
Na saunoa foi Rev Dr Benjamin Williams i le upu faamalosi mai le afioga a le Atua e luitauina ai pea le aufaauu ma le tāua o le aoga i totonu o Ekalesia o loo galulue ai. Na afea e le saunoaga a le fomai e faapea, E lē o le aoga, e lē o le maua o le Tusipasi ae o le faaaogā lelei o le taimi ua maua.

Na sosoo ma le tolaulauina o Tusipasi e le susuga i le faafeagaiga ia Tilaulelei Kirifi, a o Rev Dr Benjamin Williams na tauaaoina tusi mo i latou ua faamanuiaina. Na vaaia loimata o le olioli ma le laufofoga fiafia o le agaga faafetai i aiga ona ua faaiuina le taumafai.

O faailoga o tulaga i vasega na sili ai le tamaitai ia Lizzie Tuigamala i le tausaga lua, tulaga 2 o Aiga Aii, ma le tulaga 3 o Talauula Fakaua. O le tausaga 4 na sola ai Nimo Meleisea ma le tulaga muamua, tulaga 2 o Aseni Meleisea, ma le tulaga 3 o Faatali Fiti Ifopo.

O nisi o faailoga faapitoa, o le tamaitiiti aoga e lē faavaivai i mea e fai, toe fai faataitaiga lelei i totonu o le aoga, na maua lea e Kelemi Petone o le tausaga lua, ma o le peresetene foi o lea vasega, ae o Rev Soopale Aunese i le tausaga 4, o Rev Valoaga Lualua na mauaina se tasi o faailoga, o le tagata e lē tuai pe misi se aoga ma le faamaopoopo i mea uma e fai.

O le faaiuina o le polokalame na tuufaatasi ai le aoga atoa i le tausaga 1, 2, 3, ma le 4 faapea faiaoga i le ususina o le latou pese e momoli ai o latou alofaaga ma faamanuiaga mo mātua, ekalesia ma aiga sa molimauina lea aso fiafia, ma taualuga ai loa i le saunoaga mulimuli a le peresetene a le aoga i Aukilani ia Rev Keti Ualesi.
Au Faauu o le Tausaga 4 i le Bachelors of Theology

Au Faauu Tausaga Lua Associates of Theology

Aufaipese Tuufaatasi a le aoga