Autasi Toamua ia A le Vena

Sa umi se taimi o taoto i paga se finagalo o Igoamatua i le fetalaiga Ale Vena ma Ulu Vaomalo Ulu Kini, faapea isi suafa taua o le afioaga o Toamua pe o le a faapefea ona tapena le lotoifale o le nuu mo le palota tele o le tausaga fou. Sa umi ona fetosoai tapenaga ona sa taumafai e tasi lava se sui tauva, ina ia le toe tupu le faaletonu na aliali mai i le palota o le 2006 ma isi palota i tua atu, o le tele o sui tauva ua le maopoopo ai le lagolago, ma iu ina salalau tasi ai palota a tagata, ma iu ina manumalo ai sui faatutu o isi afioaga o le itumalo faafaipule o Faleata i Sisifo, lea o loo tulai mai ai nei le tofa Lealailepule Rimoni Aiafi.
Sa faia fono a le afioaga ma fesiligia ai pea le mataupu i le palota, poo ai ni sui o loo sauniuni, ina ia silafia lelei e pei o aga masani o tapenaga o ni faigapalota e saili ai tofi faipule o itumalo i le Palemene.
O le mau a se tasi o matai faiupu o le afioaga o fono ia sa iloa ai, o loo tau fai mananao uma Igoamatua i le avanoa.
E pei ona silafia o le tofa Ulu Vaomalo sa umia le tofi o le itumalo i se tasi o paeaiga a le Palemene ma sa avea ai ma Minisita o le Kapeneta.
O le palota tele o le 2006 na le manuia ai lona toe taumafai i le tofi. Sa tauva ai foi i le palota lea ma le tofa Ale Vena ma nisi o matai o le itumalo.
E le o le taimi muamua lea ua tauva ai Ale Vena, peitai o palota ua mavae sa le manuia. Faaalia e Ale i le tusitala o lenei nusipepa, e le faigofie le sailiga o se finagalo autasi o laua ma Ulu ma isi tamalii o le nuu poo ai e tatau ona tapuai ae o ai e oso i totonu o le maea.
O le Aso Toonai, 30 o Ianuari i le isi fono a le afioaga na toe laga ai le mataupu lava lea. “E lei faigofie ona sa le fia tuuaulafo foi le tofa Ulu Kini ma Ulu Pisimaka Crawley, ae na alu alu lava a matou felafolafoai, matuu mai le finagalo o le toeaina (Ulu Kini)”, o le faamatalaina lea e Ale Vena o le tulaga sa iai le fonotaga.
Ua ia taua o se palota ese lenei ua matagofie le amataga o tapenaga ona ua matuu atu le fingalo o nisi o tamalii faiupu o le nuu. Pau le tulaga o loo tau popole i ai, pe faamata e opogi uma e le nuu lona sauni i le palota.
“O le mea moni lava ia o tagata foi e le atoatoa le latou lagolago i mea nei o palota.
E te vaai atu e sau lava, sau lava, ma ataata mai ma faamalo mai ma fai mai i se mea e manao ai, ae oo ane i le taimi o le faamoemoe, ua ese le sui ua palota i ai”.
E le o faigofie le tauvaga a Faleata i Sisifo e pei ona saunoa Ale Vena, ona e malosi foi le lagolago a le faipule o loo tu nei i le tofi, le Tofa Lealailepule Rimoni Aiafi.
O le mau a le tofa i le Igoamatua, o le faipule o iai nei o se tagata finau ma e tausaafia foi ona uiga e tagata palota.
Afai o le a taunuu se palota laititi a Faleata i Sisifo (silasila i se tasi o lipoti i le lomiga lenei) o le tauvaga lea o le a amata ai tapenaga a le tofa Ale Vena.