Valoia palota laiti itumalo Safata ma Faleata i Sisifo

Ua amata ona feoai tala ma musumusuga ua valoia ai le toe faia o ni palota laiti a itumalo o Safata ma Faleata i Sisifo i le ogatotonu o le tausaga nei.
Ua faaalia e se molimau o le tautinoga faalauaitele a le afioga Palusalue Faapo II ma Lealailepule Rimoni Aiafi, o laua e le suia lo la tulaga o sui lagolago o le vaega faaupufai o le Tautua Samoa Party ua atagia ai lo la le usitaia o teuteuga fou o le Tulafono o Faigapalota e faasino i le tausisia e sui faipule uma o o latou tulaga ua aloaia ai i le Palemene.
Ua taua e le molimau sa lauliliuina e le Kapeneta le vaega fou lea o le teuteuga i le latou fono i le vaiaso na tea nei.
Fai mai le molimau e iai lona talitonuga e tusa ma tala o loo ia maua mai le au ooupu a le Malo, e faamamalu lava i le paeaiga o iai nei le vaega lea o le teuteuga.
Le vaega tonu lea sa tatalo ai sui ia e toalua i le Malo i se fonotaga talu ai nei a le fono aoao, ina ia tuu e faamamalu i le paeaiga fou a le Palemene.
O loo taua e se isi molimau faatuatuaina o le mafuaaga tonu lava lea ua solomuli ai isi faipule tutu toatasi sa i totonu o le Tautua Samoa ona ua fefefe i le malosi o le teuteuga o le tulafono o faigapalota.
Ua oo mai i le tusitala se mau faamoemoeina ua taua ai, na oo lava se tasi o faipule matua o le au tutu toatasi i le Fofoga Fetalai ma faailoa i ai, o ia e le auai i le pati fou i le taimi nei, ae seiloga o le a faataape le Palemene mo le sauni atu i le palota o le 2011, ona faatoa lesitala lea o lona suafa i le Tautua Samoa.
A o lei tolopo galuega a le Palemene i le masina na tea nei seia aulia le masina fou o Mati, sa pueina se ata toatele o faipule o le Palemene, lea na o le faipule o Vaisigano numera 2 e lei auai i le pueina o le ata ona sa iai sona tuatuagia.
Na uma le puega o le ata atoa o faipule, ae sosoo ma le ata o le vaega o le HRPP.
Na molimauina ai foi le taumafai o le faipule o Faleata i Sisifo e faapotopoto ane sui o le Tautua Samoa mo se latou foi ata. Peitai sa mumusu nisi o faipule i le latou faamatalaga, o le avanoa lea e faamaonia ai loa lo latou auai i le pati fou ma soloia ai loa o latou nofoa.
O le tautinoga a Lealailepule ma Palusalue ua faailoa ai o laua lava o sui o le Tautua Samoa, ua la faailoa ai foi, e le popole pe soloia ai o la tofi faipule ona o le malosiaga o teuteuga fou o le tulafono o faigapalota, lea o le a faalagolago le taimi e faamamalu ai i se iloiloga a le Kapeneta.