Alia‘e popolega i le tuai amata o faamasinoga

Ua tolu vaiaso e leai ni faamasinoga o Fanua ma Suafa talu ona a‘e galuega o lenei tausaga fou.
O le umi foi lea o leai ni mataupu e fofogaina i le Faamasinoga Faaitumalo, seia vagana le Faamasinoga Maualuga e tasi le vaiaso na amata ai, ma le Aso Gafua na tea nei sa na o mataupu sa valaau mo le faatulagaina o aso e suesueina ai.
Ua mafua ona umi ona taatia le tele o galuega a le faamasinoga ona o le tatalaina o le Maota Faamasino fou, ma ua tuai ona maea ona teu uma faila ma isi meatotino a le faamasinoga i le maota fou ma faapipii fesootaiga tau telefoni ma le initaneti, o le mafuaaga autu o le tolopo o mataupu.
O le vaiaso nei faatoa toe faaauau ai galuega ma amata Faamasinoga o Fanua ma Suafa ma le Faamasinoga Faaitumalo le District Court.
O le tuai ona faagasolo galuega ma fofogaina mataupu a aiga, ua popole ma atu matagi ai nisi ina nei avea le fesiitai o faila ma isi vaega taua o faamasinoga, e satia ai ma ni measina a aiga, poo le leiloloa o ni faila.
E faapena foi ona iai popolega ina nei maualafia ai ni togafiti faaalatua ma toesea ai ni faila o ni moliaga faasolitulafono o loo tālia le taimi e suesueina ai.
Sa maua le avanoa e fesiligia ai se tasi o ofisa sinia o le Matagaluega o Faamasinoga i le fesiitaiina o faila taua o loo iai faamaumauga o mataupu a aiga i le Faamasinoga o Fanua ma Suafa.
E musu le ofisa sinia e faailoa lona suafa, ae o lana faamatalaga, o lona foi lea popolega.
E lei maua se avanoa i le Pule Sili o le Matagaluega, ae o loo iai le talitonuga o loo malupuipuia uma ia vaega i le galuega sa nafa ma le ofisa o le tapena atu lea o pepa ma faamaumauga faapea faila i le Maota Faamasino fou.
O le tausaga ua mavae na alia‘e ai ni tuuaiga faasaga i se ofisa sinia o le matagaluega ina ua toesea se faila o ni moliaga faasolitulafono sa avea ma molimau a le matagaluega i se mataupu sa suina ai e se tasi o ofisa sinia le pulega i le leai o se faamaoniga o tuuaiga na faamalolo ai o ia, ina ua leiloa lea faila.
Ua maea le faamasinoga o lea mataupu ma ua faamamaina le igoa o lea tagata faigaluega ua toe galue nei i le matagaluega.
Ae o le tuuaia ai o se isi ofisa sinia na faia ai foi suesuega ma iloa ai, e leai se aafiaga o lea ofisa sinia i le toe leiloa o le faila lava lea e tasi.
E iai foi nisi mataupu i ni tausaga ua tuanai sa taua ai foi le toesea o ni faila o mataupu tau faamasinoga o fanua ma suafa i lalo o se isi pulega ua le o toe iai nei.
O le Maota Faamasino fou ua iai nei, ua iai ma potu faapitoa e teu malu ai faamaumauga uma a le faamasinoga, ina ia malupuipuia.
E lima miliona le tau atoa o lea maota na faatupe e le Malo o Saina.