Osi feagaiga Magiagi EFKS ma le latou faifeau

Na faatumulia le malumalu o le EFKS i le afioaga o Magiagi i le faaiuga o le vaiaso i le faafeiloai atu ai o le afioaga aemaise o le mamalu o le Pulega a Apia i Sisifo i le faafeagaiga fou o lea aulotu i le maea ai o tausaga atoa e lua talu ona faamavae atu lea aulotu i le afioga i le Taitaifono o le EFKS sa auauna i le aulotu a Magiagi ae amia loa e le Atua, le susuga i le Faifeau Toeaina Rev. Elder Atapana Moreli Alama.
O se sauniga na tumutumu ai auauna a le Atua aemaise o aiga o le susuga i le faafeagaiga fou Rev. Tuanai Uesile ma lona faletua ia Upu. O le faafetai a le Ekalesia ona ua faamaonia lenei feaigaiga.
O le susuga i le faafeagaiga fou ma lona faletua na faauuina mai i le Kolisi Faafaifeau o Malua i le tausaga e 2005 ma na valaauina loa i laua uma e galulue faafaiaoga i le Kolisi Maualuga a le ekalesia i Maluafou.
Faaalia e le faafeagaiga na fiafia tele e auauna faafaiaoga ae e le uma lava faamatalaga ma le tuufesili o tagata pe lei maua lava so la nuu ma na taua e i laua nei le faigata tele o lea tulaga ma na tatalo pea ina ia faasino mai e le Atua se afioaga o loo moomia se faifeau mo i laua.
Faaalia e le failautusi o le Aulotu le susuga i le Aoao Fesoasoani, Puleiata Eli Tuimalealiifano, o le faigapalota lona tolu a le Aulotu lea na faamautu ai loa le filifilia o le susuga Tuanai ma lona faletua, ma o le vaavaai lava a le aulotu e filifili e le Atua se faifeau i le maea ai o faiga filifiliga tetele sa iai.
Na faatolu ona faatautaia le faigapalota lona tolu lea ma o le iuga lava ma maualuga ai lava palota mo le susuga ia Tuanai.
O fautuaga na ave e le susuga i le Faifeau Toeaina o le Pulega, le susuga Siolo, e taua tele le talavou o loo iai lenei ulugalii ma le galuega e pei foi ona sa amata mai ai le susuga Atapana Alama.
O lona nuu muamua lava lea ma le faletua ia Ramona ina ua iu mai i Malua ma ua maliu ai lava.
O se tama na toe manatua uma i le aso e le Pulega ma le Aulotu ona o le tele foi o lona sao i le atinae o fanau a Magiagi, o le nuu aemaise o autalavou seia oo lava ina avea ma Taitaifono o le EFKS.
O ana faataitaiga na amata mai lava i le nuu na tausinuu ai ma o le tulaga foi lea na taua e le faafeagaiga fou, o le iai o lona manatu ina ua tofia i laua e galulue i Magiagi, e le o se galuega faigofie o le a feagai ma i laua ae e pei o le matua o lana lauga i le feagaiga na osia, o o’u manaoga e lē o le filifiliga lea a le Atua… ma o le Atua foi e faamoemoe lava i ai i lana galuega fou o le faifeau tausinuu faatasi ai ma le faletua ia Upu.
O le susuga Tuanai Ualesi ma lona faletua ia Upu e mai i le afioaga o Sasina i Savaii.
O le Aulotu i Magiagi e latalata i le 50 matafale faaopoopo i ai matafale fesoasoani e lata i le 15. O le ekalesia tele lea i totonu o le nuu e ui o loo iai ma le Ekalesia Metotisi, le Ekalesia a Iesu Keriso o le Au Paia o Aso e Gata Ai ma le Ekalesia Aso Fitu.