Ausia e Samoa le uluai manulauti o le Meleniuma

O le vaiaso na tea nei na faalauiloa ai i se fono tele a Minisita o Faatoaga a le Pasefika, lea na talimalo ai Samoa, le mafai nei e Samoa ona ausia le uluai manulauti o le Meleniuma e pei ona faataatia mo le tausaga e 2015.
O le manulauti lea ua mafai ai ona faapea mai e oo atu i le tausaga e 2015 ua ‘afa le aofai o tagata Samoa ua see ese ma le ola mativa ma le lē tagolima.
O le faamalosia o lea tulaga ona ua mafai ona faatino e Samoa galuega i ana tulafono, faiga faavae ma galuega faatino o le atinae o faatoaga ma faigafaiva. O galuega nei ua patino tonu i le manulauti muamua lea e pei ona ta‘ua.
O le faauluuluga o le Faalapotopotoga o Taumafa ma Faatoaga a Malo Aufaatasi le FAO na auai mai i le fono tele lea na usuia i Samoa ma ia faalauiloa ai loa lea tulaga maoa‘e ua agai i ai Samoa.
O le taimi lenei e tele manulauti o le meleniuma e lei taitai lava ausia aemaise lava i atunuuu tau atiae o le lalolagi, ma o le mafuaaga lea o le faafiafiaina tele o le FAO i le mafai ai e Samoa o se tasi o atunuu laitiii tau atiae o le lalolagi, ona ausia vave le meleniuma aupito faatāua i lenei taumafaiga.
O le tausaga e 2000 na sainilima uma ai atunuu o le Faalapotopotoga o Malo Aufaatasi ina ia ausia le tausaga e 2015 ua mafai ona faatino nisi o galuega ina ia faaleleia ai le soifua o tagata ola uma o lenei lalolagi.
O nisi la ia o manulauti ua faamamafa le faatino pe afai e manao le atunuu e atiae atili ona tagata ma lona siosiomaga.
O le manulauti muamua lava o le tafi esea o le fia ‘ai ma le ola mativa i atunuu uma e pei ona iai le tuutuuga ia oo atu i le 2015 ua faamautu, ua ‘afa lelei le atunuu e lē o toe maua i sea tulaga.
O le isi ‘afa e faaauau i ai galuega toe faaleleia. Mo Samoa ua finauina soo le ola mativa ma le fia ‘ai e pei ona faapea mai le alii Palemia i nisi o nei finauga, e lē o iai ma se tagata Samoa o ola fia ‘ai ma afai o iai nisi o ola faapea, o lona uiga o le faapaiē lava ua mafua ai lea tulaga.
E lē gata i lea ua iai foi manulauti, ina ia tutusa avanoa e ave i alii ma tamaitai, ia aooga fua fanau laiti mai le lima i le 14 tausaga le matutua, ia tafiesea sauaga e faia faasaga i tamaitai.
Ia faaitiitia le sosolo a le gasegase o le HIV/AIDS, ia unai puipuiga o le siosiomaga ma le faasao, ia malosi foi galuega e faaleleia ai le soifua maloloina, ma ia toatele le numera o tamaitai e ofi atu i totonu o le Palemene.
Ua tele galuega ua faatautaia e le itu tau i aoaoga ma o se tasi lea o manulauti e foliga mai o le a faigofie ona ausia auā o lea ua aooga fua le fanau laiti ma ua faatupe uma e le Malo o Samoa meaaoga a le fanau.
E tele foi galuega ua agai ai i luma Samoa i faiga faavae ma tulafono e unai ai puipuiga o le Siosiomaga atoa ai le Soifua Maloloina ae ua totoe nei o le tausaga fou oo loa i le tausaga lea e tapulaa uma i ai taumafaiga a malo nei e i totonu o Malo Aufaatasi.
O Samoa foi o lea e see ese mai i le lio o atunuu     aupito matitiva o le lalolagi i le tausaga fou, o se isi pine faamau ua mafai ona ausia le manulauti muamua lea o manulauti e fitu o le meleniuma.