Avea Ekalesia Mamona ma Sui o le Fono Ekalesia Soofaatasi a Samoa

Ua faaopoopo atu nei se isi ekalesia ua ofi atu i le Fono a Ekalesia Soofaatasi a Samoa, poo le National Council of Churches a Samoa, e avea ma ona sui auai.
E pei ona talia ai e le Fono a Ekalesia Soofaatasi talu ai nei, le avea o le Ekalesia a Iesu Keriso o le Au Paia o Aso e Gata Ai, poo le Ekalesia Mamona ma ona sui auai.
Ua tele tausaga talu ona faatūina lenei ekalesia i totonu o lo tatou atunuu, ae o lea faatoa ulufale e avea ma sui o le Fono a Ekalesia Soofaatasi Kerisiano. Ua atoa ai nei le 10 o ekalesia ua avea ma sui o lenei fono, ae 11 i le mafutaga a tina Kerisiano o Samoa.
O le faavae e mafai ai ona agavaa se ekalesia e ofi atu e fai ma sui o le Fono a Ekalesia Soofaatasi, pe afai na te talia taiala poo principles o loo avea ma sini o aoaoga faalelotu Kerisiano, lea o loo faatino ai le galuega tala‘i a ekalesia ua avea ma sui o le Fono, e pei o nisi o ekalesia autū i le atunuu, le EFKS, Metotisi ma le Katoliko.