“O le itu sili ona tāua ia te a‘u ia ou mafaia ona fesoasoani ma soosoo tau‘au i fanau aoga ma nai o latou aiga e tau aveese ai nisi mafatiaga e pei ona oia ai i le mafui‘e”, nisi ia o saunoaga a Tana Umaga na faamalosiau atu ai i tamaiti aoga o Linwood Ave School i le latou assembly i le Aso Lulu ua mavae atu nei.
E pei ona avea ai lenei alo tautaua o Samoa i le taaloga lakapi ma amepasa (rugby ambassador) o le kamupani courier DHL a Niu Sila lea sa manaomia ai lana fesoasoani na te kilivaina i aoga pusa meaalofa tetele na ofoina mai e le faalapotopotoga o le KidsCan, o le Charity faapitoa lea mo le All Blacks ma auina atu mo le 18 aoga tulagalua i Kalaiesetete.
Na faalauiloamai e le pule sili o le KidsCan Charity, Julie Helson, o se avanoa matagofie lea ua latou saunia ai ni pusa e 500 ua faatotogaina i meaai aemaise mea e aogā tele mo le lotoifale o le aiga auā lava le anofale o fanau.
E 18 aoga i le itu i Sasae o Kalaiesetete ua faamoemoe mo le tufatufaina atu i ai o pusa, ma o pitonuu ma aoga lava nei sa matua afaina e pei o Aranui, Bexley, Avonside, ae o le aoga i Linwood Ave lea o loo faasoasoa atu ai pusa meaalofa nei e 500.
Ua uma foi ona saunia ofu mafanafana, seevae ma ofu talitimu mo fanau aoga auā le taumalulu pei ona faailoa mai e le KidsCan, ae faafetaia foi le ofoina mai o le auaunaga fua a le kamupani DHL courier mo le saunia o atigipusa ma le felauaina o uta i aoga eseese.
Na maitauina i lea aso le fiafia o nai tamaiti ina ua feiloai i le alii o Umaga e pei ona muai faafeiloai ai i le latou assembly manaia ma le pisapisao, o le alii o Etelani Pouli, 10 tausaga sa faia le faatalofa i le gagana Samoa, na vaaia le foliga ataata fiafia o Umaga, o se alii e ese le tausaafia i fanau.
E tusa ma le 20 fanau Samoa e aooga i Linwood, na faaalia foi e le tamaitai pule Christine Harris, o se vaiaso lea i tamaiti aoga ina ua iloa o le a asiasi mai Umaga i uiga suia i le fiafia (a big lift in kids spirits). Ina ua mae‘a se faamatalaga faafiafialoto a Umaga i le fanau ae o se luitau faaleaoaoga ‘anoa foi lea sa ia tuu atu i le fanau, ona taape lea i le malae taalo se‘i fai sina lakapi laititi ma faaali le taleni a Umaga, ma o i la sa tau taofiofi ai ona ua fia sitepu i luga o le malae tagata uma e oo lava i mātua, au pueata ma tusitala.
Saunoa Umaga “afai ua mafia ona ia aumai se laumata ataata i nai fanau, faafetai lea, ae ao pea ona tutū faatasi mo le toe fausiaina o le aai o Kalaiesetete.
