E faafetaia le agalelei o le Atua, ua ia faia lenei avanoa tāua e mafai ai foi ona tatou feiloai i luga o nei laupepa. Malo le soifua maua ma le lagi e mamā.
O lenei tusitusiga, ua faaigoaina o le “Afua mai mauga le manuia o le nuu”. O le faamoemoe o se fetufaaiga ma se fesoasoani ina ia manuia le taitaiga i totonu o ekalesia ma faalapotopotoga.
E iai le talitonuga laualuga, o le manuia o se Ekalesia o loo iai lea i Taitai, susuga i faafeagaiga, ma toeaiina ma tiakono atoa ai ma lona taitaiga. E faapea foi i totonu o aiga. O le manuia e faalagolago lea i taitai, poo mātua, ma le auala e taitai ai e le tamā ma le tina le fanau. I totonu o kamupani ma pisinisi, e faalagolago foi le manuia i le lelei o le faauluuluga poo le pule. A faatamala le faifeau ma taitai o le ekalesia, ona leai lea o se fealofani o le ekalesia.
O nisi o taimi e lē misa le ekalesia ae leai se taitaiga mautu e agai uma i ai tagata, ona tofu lava lea o le tagata lotu ia ma le mea e manao ai ma le auala e fai ai, ona faigata ai lava lea ona iai ni suiga ma agai i luma ma manuia, ola ma tupu le ekalesia.
Atonu e talafeagai ai le upu a le Perofeta o Isaia, “Ua taitasi le tagata ma faasaga i lona lava ala”.
I totonu o le aiga a faatamala foi taitai o le aiga, ona pule lava lea o le tamaitiiti ia i le mea e manao i ai. O le a leai se usitai ma leai se manuia, ma leai foi se nofo lelei o lea aiga.
I le aganuu a Niu Sila aemaise o papalagi, e oo loa le matua o le tamaitiiti i le sefuluono, i le sefuluvalu amata loa ona pule le tamaitiiti ia te ia ma lona olaga. E lē toe iai foi se tonu tele a mātua.
O se tasi lenei o aganuu o loo aafia ai foi le ekalesia.
O le mafuaaga lena o loo tulai mai ai se fesili tele i mātua, o faifeau ma taitai o ekalesia e faapea “aisea ua lē toe omai ai le tupulaga talavou i le lotu”?
Tailo i sau maitau ma sau silasila i ai, ae o le mea moni lava, ua tau leai ni tupulaga talavou e fiafia e o i le lotu.
E lē fuatasi i se ekalesia. E lē na o Ekalesia Samoa ae faapea lava i atunuu uma ma gagana uma. Masalo e tau feoloolo lava lotu Samoa. A oo loa ina oo atu le soifua o le tama ma le teine i aoga maualuluga, amata loa ona iai le faamaamulu ma le lotu. O le mau a se tasi faifeau na ou
faalogo i ai e faapea, “E uma atu loa le matua e masani ai ona auai i tala o le lotu tamaiti, amata loa ona tau lē vaaia le tupulaga”.
Pe ā ma le 8 tausaga talu ai na fetaiai ai a‘u ma lenei fesili tele ina ua ou vaavaai atu i le matou ekalesia, ua tele i tagata matutua le lotu i Aso Sa ae ua tau leai ni tupulaga talavou. E lē gata i lea ae o le tele foi o mātua o loo aafia o latou alo i ni faafitauli ma ua mafatia ai loto o nai mātua.
O le mea moni lava sa ou tuufesili foi a‘u ma ou taumafai e tali lenei fesili. O lea na ou manatu ai e sili lava lo‘u fesili i nisi o le tupulaga talavou e aafia ai ma nisi o talavou i totonu o le matou ekalesia, pe aisea ua lē fiafia ai e toe o mai i le lotu.
O tali na latou aumai ia te au, na avea lea ma fesoasoani sili i lo‘u taumafai e saili se auala e fesoasoani ai i alo ma fanau lalovaoa o si o tatou atunuu ina ia auai i le lotu ae silisili ai ia fiafia i latou i le Atua.
O nisi o tali na faateia ai a‘u ma na pei ou te vaai i se vai manino ina ua ou faalogo ma malamalama i mea o i o latou loto.
Masalo pe sili atu i le 80 pasene o mea na latou faailoaina mai ma a‘oa‘oina ai a‘u, o mea e mafai lava ona suia pe a iai le naunau i totonu o le ekalesia e sui.
O nisi nei o mea na faailoa mai e nisi o tupulaga talavou na ou talanoa i ai.
Atonu tatou te talia nisi o tulaga ae tatau pea ona tatou tuu le avanoa e talanoa mai ai i latou.
Talu ai ona o le a tatou talanoaina le mataupu e aafia ai talavou o lea ua manatu ai o le a fefiloi pea le gagana ina ia faafaigofie ai foi nisi o faaupuga mo le aufaitau.
• E ese le boring o le lotu. (E ese le pē o le lotu).
• Matou te lē malamalama i le faasamoa pe a oo i le taimi o le lauga.
• Ae ā pe a usu ni pese lotu faaneionapo. How about singing some modern Songs?
• E fosi pe faamalosi matou e o matou mātua i le lotu ae leai se loto e fia lotu.
• Ou te ma e valaaulia a‘u uo i le lotu.
• E faasā matou ona o i isi ekalesia poo polokalame faaautalavou a isi lotu.
• E old fashion tele le fai o pulou papae i le lotu.
• E ese le naunau o o‘u mātua e o i le lotu ae lē faia le mea la e fai mai ai le faifeau. Our parents are very involved in church but never put into practise the minister’s sermon.
• Matou te mananao i le faifeau e malamalama ia i matou o loo fananau i atunuu i fafo. We want the minister to understand us as young, New Zealand/Australian born Samoans.
• E manaia pe a fai ma faapalagi le faifeau, pe fai foi se lotu faaperetania. It would be nice for the minister to speak English, or may be run an English Service.
E tele isi vaega ma mafuaaga na tuuina mai e nei tupulaga ae ua lava le sefulu e faailoa ai mea o i latou loto. O le mea moni lava ua a‘oa‘oina ai a‘u, e fia auai uma tupulaga talavou i le lotu ma fia maua le lagona mitamita i le latou ekalesia. Ae o loo iai foi le lagona, maimau pe ana maua le avanoa e faia ai ni suiga nei i totonu o le matou lotu.
Atonu o lea ua taatia mai nei se luitau tele lava mo i tatou ua avea ma taitai ma faifeau i totonu o le ekalesia.
O le a faapefea ona tatou tali i nei manaoga i totonu o le ekalesia?
O se faaiuga faataitai ua moomia. E lē moomia se fono a le ekalesia uma e saili se fofo o le faafitauli ae ua tatau nei loa i le taitai ona faia ni nai suiga ina ia faatupu pea le fiafia o le fanau i le lotu ma mea faaleagaga.
Ou te fia faasoa atu ni mea na ou a‘oa‘oina ma taumafai e fai i ai ni suiga i totonu o le matou ekalesia, atonu e iai se aogā pe leai.
Pe a ma le tolu tausaga talu ai na asiasi mai se tasi o faipule o le Palemene o le malo o Niu Sila i se tasi o a matou sauniga i le Aso Sa, ma na ia vaaia ai le toatele o tupulaga talavou i le lotu ma o loo auai foi i mea e fai faalelotu, e pei o le faiaoga Aso Sa, faili, tapenaina o le falesa ma isi mea faapena.
Ona ia fesili mai ai lea ia te au poo le ā la‘u secret (mealilo poo le togafiti) o loo fiafia ai le toatele o tupulaga e omai i le lotu.
Na mafua lea fesili ona o si o matou pitonuu o Manurewa i Aukilani e mafuli lava ina tau le pua ma lafo i tupulaga talavou ona o le tele o faafitauli e tutupu ai. Na avea lea fesili na ou toe fesili ai foi i tupulaga talavou pe aisea ua omai ai i le lotu ma fiafia e saga omai i Aso Sa uma. O le toatele foi o i latou e lē lolotu o latou aiga.
O nei tali o ni tali moni lava na latou aumaia ia te au ma o loo tusia uma i luga o le facebook pe afai e fia silasila i ai i le faaperetania. Ua ou taumafai e faaliliuina ma teuteuina ina ia mafai ona faamatalaina i le gagana e faigofie ona malamalama ai. Ou te talitonu o le a lē afaina i lou finagalo nisi o tali ae ua manatu e mafai ona faailoa ina ia mafai ai ona malamalama i loto ma lagona o le fanau.
O se tasi o talavou faato‘ā 4 masina talu ona lotu mai o lana tala lenei, “O a‘u ma la‘u uo tama e fou mai i le lotu ma le autalavou. O le mea na tosina mai ai i ma‘ua ona e lē faafoliga ae e ese le moni o tagata, faapea ma le Laugaina o le Upu. E mafai ona malamalama i ai ma fetaui lelei ma le matua o le matou auga tupulaga.
E iloa lelei foi e le faifeau ia matou faaletonu faaleautalavou auā na sau ai foi o ia ma faigofie ai ia i matou ona tatala atu o matou loto ma iloa ai o matou le autalavou e lē o ni tagata tiapoloa. O le isi tulaga, e ese le tele o mea e tutupu ma mea fou e fai ae lē o le fai soo o taaloga e tasi.
E tele mea fou e fai ma le isi tulaga o le autū o polokalame faaleautalvou o le ola auauna lea ma fesoasoani mo le matou augatupulaga. E faigofie ona tosina ona o le Atua i loto o tagata a lē o le fia tagata e mafua ai ona afaina”.
Rachel 11 tausaga.
My boyfriend and i are new to youth but what drew us was,
· It was real, the Word, the people, not phony.
· It was relatable, to our age groups, you don’t pretend to know our faults, you do know because different ones have been through them and it helped us to open up not feel always like the “evilest new sinner” etc.
· There’s so much on & always exciting having non-repetitive games, music, fun, activities, chats, word time. Always fresh. So for me personally, because the heart of switch is dedicated to serving our generation the attractiveness was fully God in people without their pride getting in the way. Rachel 11.
E ese le tele o mea o loo ta‘ua mai e lenei tamaitai talavou. O le a se‘i o tatou taumafai e vailiili i le vaiaso a sau. Ou te fiafia i sou finagalo i lenei mataupu. Imeli mai pe tusi mai foi i le Samoa Times.
Tusi mai i le luiponifasio@gmail.com poo le silasila ane i le
www.luiponifasio.wordpress.com
Ia faamanuia le Atua ia te oe i lenei vaiaso
Lui Ponifasio
