O Anthony Leaupepe, Fetu-Ole-Moana Tamapeau ma Violet Ekenasio o sui ia o Samoa ua faamanuiaina mai le palota mo sui faatutū mai atumotu eseese o le Pasefika e avea ma fofoga taumomoli o a latou tagatānuu i totonu o le pulega faaitumalo i (Council) Ueligitone.
O Anthony Leaupepe, o se alo o Samoa mai le afioaga o Fasitoo-uta. Sa malaga mai o ia i Niu Sila ma aumau i Ueligitone i le tausaga e 1987 ma ua savalia nei le luasefulu tausaga talu ona i Niu Sila.
O ia o loo faauluulu i ai le Aumaga Saoao Pasefika Trust ma o loo galue nei i le fautuaina o tagata Pasefika i Niu Sila i aafiaga o le taumafa tapaa ma le ava malosi.
O le tamaitai o Fetu-Ole-Moana Tamapeau, o se alo Samoa e iai lona piitaga Niue mai lona tuaa. Na faauu mai o ia i le Iunivesite o Massey i le faailoga o Mataupu tau Fesootaiga ma sa galue i le nusipepa o le Manukau Courier, le mekasini o le Spasifik faapea le Aoga o Matata Eseese o Whitireia.
O le taimi nei o loo galue o ia i totonu o se kamupani mo fesootaiga, le Media Monitors, ma o loo ia tauave pea ona matafaioi i galuega tauofo mo le Koluse Mumu faapea le faatinoina o nisi galuega mo le manuia o tagatānuu Pasefika i totonu o le laumua.
Mo le lima o tausaga na avea ai Violet Ekenasio ma se tasi na galue i totonu o le Citizens Advice Bureau. Sa ofo atu foi lana fesoasoani mo tagata matutua i totonu o le Aged Concern New Zealand.
Saunoa o ia o ana galuega galue mo tagata atumotu Pasefika o lona sootaga malosi lea e ofoina atu lana taleni mo le faaleleia o nisi o mataupu e pei o itu tau fesoasoani mo tagata matutua, faaleleia o le siosiomaga faapea le tausia lelei o meaola, ma le taumafai lea ina ia aveesea mai tupulaga teine mai luga o auala. O loo galue nei o ia i le Primary Pacific Finance ma sa faauu mai o ia i se faailoga tikeri mai le Iunivesite o Vitolia.
O nisi o sui tauva sa lei faamanuiaina lo latou taumafai e aofia ai Tuanuu Pisa Joe Alaifea, Faanuualii Aniterea, Ida Faiumu-Isaako, Tuuu Kenape Faletoese, Tracey Sa ma Maanaima Soa-Lafoai. Sa faaalia mai o Samoa o le atunuu e pito i tele le numera o sui sa faaulu mai mo lenei palota.
O sui e toatolu ua faamanuiaina nei o le a avea ma fofoga taumomoli o tagatānuu Samoa mo le faatalatalanoaga o nisi o mataupu ogaoga e aofia ai ma sui sa faatutū mai i isi atumotu o le Pasefika e pei o Toga, Fiti, Niue, Rarotoga, Tokelau ma Tuvalu.
Ua na o Samoa e toatolu sui i totonu o lea komiti faufautua, ma o nofoa foi ia e tolu sa faamatuu ane. O isi atunuu e na o le tailua ma le tasi o latou nofoa mo sui o lea lava komiti.
E lē faigofie ia tofiga ma le fesagaiga ma le pulenuu o Ueligitone, auā o tiute ia ma faiva alofilima o ia galuega o le a sauni atu i ai mo le tolu tausaga o muamua.
O manaoga o tagata Samoa ma tagata Pasefika ua i o latou aao ina ia finauina ma momoli atu i le pulenuu, ma sui faufautua mo le faia i ai o faaiuga.
O le aso 11 o Aperila ua faailoa mai o le a auai uma atu ai nei sui mo la latou fonotaga muamua ma faaaloaia ai o latou tofi. E tolu tausaga ma faia lea palota mo sui faatutū.
O le faaulu mai o suafa o sē o loo fia tauva e tatau ona iai sona piitaga Pasefika, o loo aumau totonu o le laumua i Ueligitone o loo iai pulega a le Council a Ueligitone, ma o loo mafai ona palota i le palota faatulafonoina.
