E lē taugofie le ave o gasegase e faia o latou taotoga i atunuu i fafo e pei o Niu Sila ma Initia. O se faiga, e faitau miliona tālā tupe e faaaluina ai i le tausaga e tasi, ma o se tasi lea o polokalame taugata lona faatupega mo tagata totogi lafoga a le atunuu. O lona uiga e faamanuiaina na’o i latou e talia e le malo i latou tuutuuga faapitoa e agavaa ai le ave e le malo i fafo. O se tasi lea o mafuaaga o loo agai ai le silasila a le malo, ina ia faia se isi faiga e faataugofie ai mo le malo Samoa. Saunoa le Palemia, Tuilaepa Lupesoliai Sailele Malielegaoi, o le ave soo o gasegase e togafitia i Niu Sila ma Initia, i lalo o le polokalame a Samoa, ua atili ai ona faavalevalea foma’i Samoa.
“O le mea lea ua mātele iai tatou foma’i o le avatu a o lea ma’i ave i Initia, ave i Niu Sila, pei la o le mea lea e qualify ai tatou foma’i o le la’uga o tagata e ave i fafo ae le o ifo latou e taoto.”
“O le mea lena e maua ai le poto masani, o lea e tatou o ma ave tatou tagata mama’i e fai iai galuega o togafitiga i fafo ma atili ai lava ona atamamai foma’i i fafo, ae o le le togafitia iinei ma atili ai lava ona faavalevalea tatou foma’i.” O le talitonuga a le alii Palemia, e faavae lea, o le tele o le faatinoga o le lelei foi lea ma atili maua ai le poto masani poo le fuaitau faaperetania o le practice makes perfect.
Faaalia e Tuilaepa, o le tausaga na tea nei, lea foi ua sainia ai le maliega a le malo Samoa ma le falema’i i Initia, lea ua ave agai iai tagata Samoa mo togafitiga, ona o le lē mafai lava ona faatino o taotoga i le atunuu.
“O lona uiga ua tatau ona silasila iai le Matagaluega o le Soifua Maloloina ia faaaogā tatou lava e foma’i e faia taotoga iinei.”
“Auā o le mea sa’o lava ia, a toaaga lava e fai taotoga iinei o le faalauteleina foi lea o le latou malamalamaga faafoma’i, ae lē na’o le ave i atunuu i fafo ma saga lelei ai ma faalautele le malamalama ma le iloa o foma’i i fafo.”
Ta’ua foi e Tuilaepa, “O le mea lea o le talia gata e o tatou tagata o le foai atu o totoga e faaaogā e le isi tagata o loo moomia, o se faiga lelei, ae pau lava o tatou e talia gata tele.”
“Ae a tatou fua i le faatupulaia o le mamalu o le atunuu o loo faamamā toto i le falema’i ona o le ma’i suka, atonu o se laasaga e faaono oo iai manatu, ae lē faapea o le a fosia foi.”
O moomooga a le Palemia e pei ona saunoa iai, o le faatino pea i Samoa nei o taotoga aemaise lea ua faaleleia fesootaiga tau upega tafai i lagi. “Manatua o le isi lea faiga o loo faatino ai taotoga i fafo, o le faia lava o taotoga ae faatonutonu mai e isi foma’i e faaaogā ai la fesootaiga televavave nei, o lona uiga e mafai foi ona fai i Samoa nei.”
Na fesiligia le Palemia, i le tulaga o le gafatia o le faatinoga o lea faiga i Samoa nei, pe a fai ae taunuu.
“Ioe, se e gafatia uma lava ona fai, pau a le mea o le sogasoga e tatau ona fai a’i, e iai lava le isi mea na i tatou foma’i e pei na’o le usu mai lava i le taeao ta le ‘afa o le fa alu i le fale, e tau lava ina ia faataunuu, ae lē sogasoga e faatino le galuega.” Ta’ua foi e le palemia, o le isi foi lea mafuaaga e aumai ai e le malo nisi o foma’i maualuluga faapitoa e faatino taotoga iinei, ina ia vaavaai ma a’oa’o mai ai a tatou foma’i Samoa i le tomai faafoma’i. “O le isi lea tulaga tāua, o le a’oa’oina i le vaai ma mātau.” Saunoa le Palemia, ua faasee atu i le Matagaluega ia tagatagai i lea tulaga tāua.
