O le Kolisi o Palalaua i Siumu e faitau vaiaso amata a’oga o le tausaga ua mavae i le faaiuga o Ianuari o le 2018 ae malala ma liu lefulefu le falea’oga. Na masalomia o se faaletonu i uaea eletise na mafua ai le mu. O se tausaga fou faigata lea mo le komiti a le a’oga i le saili oni laoa ma maota o le nuu e a’e iai fanau ma faia ai vasega a’o tau saili se fesoasoani e toe fau ai se falea’oga fou.
O le vaiaso ua mavae na tatala umusa ai le falea’oga o le kolisi o Palalaua ma ua fetaui ma le toe a’e o a’oga o lenei tausaga fou 2019. E silia i le 3 selau afe tala le tupe o le inisiua na maua ma fau ai le falea’oga faaopoopo iai ma le sao o le komiti ma le a’oga e 17 afe tala.
Na faailoa e le Palemia i le feiloaiga ma tusitala o le faiga fou lea ua faatino o le totogi e le Malo o le inisiua o falea’oga a le Malo ma o le Kolisi o Palalaua ua faamanuiaina ai. O le falea’oga tulagalua o Vailoa Faleata na mu le lua aso o le tausaga fou, e oo mai lava i le taimi nei e lei maua mai se faamatalaga i leoleo poo ua maua nisi na faatupuina le malaia e pei ona malosi masalosaloga o le mafuaaga lea o le mu. Na faaalia e le Palemia o le isi lea tiute taua o le komiti o se a’oga o le vaavaai lelei o vaega uma o le falea’oga ina ia mautinoa o loo saogalemu ma le afaina ai ise faalavelave tau mu. Na faaalia foi e le palemia e iai isi faaletonu e masani ona tutupu e pei o le tuai o uaea eletise ma faigofie ona ‘ati e siumu ma mafua ai se afi e aafia ai le falea’oga.
Pe a oo ina afaina ise mu e le alo tamala le suesuega aua o lea ua inisiua, e o mai tagata popoto mai fafo e faia sailiiliga, ma a maua ane o se faaletonu e mafua i le faatamala poo se mu foi na faatupu ese tagata o lona uiga e le maua se seleni mai le inisiua.
O le falea’oga o Palalaua e umi se taimi sa faatali ai i suesuega ina ia faamautu lelei le pogai o le faalavelave. Ina ua maua le seleni mai le inisiua na faatoa amata ai loa ona tapena le galuega.
Ua faafetai ai le palemia ma le Malo i le komiti ma faia’oga aemaise o le nuu i le lava onosai a’o faatali le taunuuga o suesuega. O le faafetai foi i matua ma aiga e ana laoa ma maota sa faaaoga e fanau mo a’oa’oga a’o faatali le galuega ua maea nei o le falea’oga fou o le Kolisi o Palalaua.
