Pale le tamaitai o Maui Leutu tulaga sinia i galuega faasalalau

O le tofa Maui Leutu Mose (itu taumatau) ua suitulaga i le tofa Vaasili’ega Iupati Lagaa’ia ua malolo litaea
O le tofa Maui Leutu Mose (itu taumatau) ua suitulaga i le tofa Vaasili’ega Iupati Lagaa’ia ua malolo litaea

O le lata i le faaiuga o galuega o le tausaga ua mavae 2018, na filifilia ai se tasi o tamaitai ua silafia e le toatele lona siufofoga i galuega faasalalau i le leitio a le atunuu le 2AP, le tofa Maui Leutu Mose e avea ma se tasi o faauluuluga o galuega faasalalau a le leitio o loo pulea ma faatupe e le Malo.

O lona filifilia na faamaonia e le Komisi e pulea tagata faigaluega a le Malo ina ua mae’a ona faasalalau le avanoa ma faatalanoa nisi sa tusi talosaga. O totonu lava o le li’o o le galuega faasalalau na talosaga ai nisi sa fia maua lea tulaga sinia ma filifilia ai le alo tamaitai o le atunuu ua tele tausaga o galue o se tagata faasalalau. E filifilia o ia o loo seei i se isi tulaga sinia i le vaega o tala fou ma polokalame a le leitio a le Malo.

Na faaalia e Maui lona agaga faafetai ina ua filifilia o ia e suitulaga i se tasi o tamalii ua tele foi tausaga o lana tautua i tomai tau faasalalauga le tofa Vaasili’ega Iupati Laga’aia na malolo litaea i le ogatotonu o le tausaga ua mavae. Na amata galue le tofa Maui i lea tomai a’o tasi le pulega o galuega tau faasalalauga a le Malo lea sa faauluulu i le tofa Tupa’i Kuka Brown ua fai i lagi le folauga i tausaga ua mavae.

O lona tomai i galuega faasalalau na faaiuina ai ana a’oa’oga i Niu Sila ma ia maua ai le faailoga Tipiloma i galuega faatusitala ma le faasalalau. Sa galue foi Maui Leutu i se tasi o leitio mo tagata Pasefika i Niu Sila le Niu FM, ina ua tasi foi le pulega o lea auaunaga tau leitio mo tagata Pasefika, ma o se galuega sa galue ai a’o aumau o ia i Aotearoa.

O le mae’a o ni tausaga o aumau i Niu Sila ma galue ai mo le Niu FM sa toe taliu mai ai Maui i Samoa ma toe faaauau lana tautua i le leitio o le 2AP seia oo ina filifilia nei e tauave le tulaga ta’ita’i i le faatulagaina o galuega faasalalau a le leitio a le Malo ma ia vaaia foi nisi o galuega fai a le leitio.

“Ou te faafetai i le Minisita ma le Pulega o le Matagaluega io  Fesootaiga o loo iai le vaaiga o le leitio ona o le faatuatuaina o lo’u tagata e tauave lenei tulaga sinia”. Ou te faafetai foi ia i latou sa matou talosaga uma i le avanoa”. Faaalia foi e Maui o le faalagolago lava i le Atua i taimi uma o le a maua ai le fesoasoani i le faatinoina o ona tiute ma tautua le Malo ma le atunuu i le mea silisili.