Na malaga mai ai i Samoa nei le sui peresetene o le faletupe o le lalolagi, e talanoaina tulaga o le galulue faapaaga ai o le malo Samoa ae faapea foi le asia lea o nofoaga ma atinae o loo mafai ona fesoasoani mai ai mo le atinaega o Samoa.
O Axel van Trotsenburg o le sui peresetene lea o le faletupe o le lalolagi i atunuu o Asia faapea ai le Pasefika atoa. O lona ofisa e i Niu Ioka i le nofoaga Tutotonu o le Faletupe o le Lalolagi ae o lana malaga taamilo i nofoaga ua i lalo o lana vaavaaiga lea na asia ai ma Samoa i le faaiuga o le vaiaso i ona tua atu.
E na o le lua aso o lana asiasiga i Samoa ae na masii uma mai sui o lona ofisa i Fiti mo le Pasefika lava ia auā le tapenaga o lana faimalaga mai.
Na muamua lava feiloai atu i le Alii Palemia ona faagasolo lea ma se fonotaga ma sui mai faalapotopotoga tumaoti o le atunuu ae faapea foi sui sinia mai i le malo.
Faailoa e von Trostenburg o le galulue soosootau‘au o Samoa ma le faletupe o le lalolagi o loo i se tulaga lelei. Mo Samoa lava ia ua oo atu i le 11 atinae o loo faatupeina e le Faletupe o le Lalolagi ma ua oo atu i le $184.4 miliona (tala Samoa) le seleni ua faamatuu mai e faatupe mo ia atinae.
Na ta‘ua e von Trostenburg o le feiloai atu i le Alii Palemia faapea ma sui mai faalapotopotoga tumaoti ua tele ai sona iloa i manaoga a o galuega faataatitia mo Samoa nei i soo se atinae aemaise o atinae ia ua fesoasoani i ai le Faletupe o le Lalolagi.
Na ia asia foi le kamupani a le SMI mo se tulaga i le faagasologa o le fesoasoani na faamatuu mai mo au faifaatoaga na aafia i le afa o Eveni. O le tasi lea o kamupani o oloa faufale ma oloa tau faatoaga ua agai i ai se fesoasoani tau tupe a le Faletupe o le Lalolagi ae agai atu faifaatoaga e filifili manaoga e ala i meafaigaluega mo le faaleleia o a latou faatoaga.
Na asia foi le vaega o laau totō i Nuu ma faaalia ai lona agaga fiafia ona o loo faaaogā tatau e Samoa tulaga o fesoasoani o loo faamatuu mai, lea ua ia vaaia, ae lē gata i lea o se lafu manu i se tasi o sui fai faatoaga i Fiaga.
O se tasi o polokalame na faalauiloa mai e le sui peresetene o le Pacific Possible poo atinae mo atumotu o le Pasefika, lea e ono vaega eseese o le a aofia ai le itu tau tagata tafafao, o atinae o gataifale, malamalamaaga i le itu tau tamaoaiga, o avanoa faigaluega, galulue faatasi ma ona aafiaga.
Ta‘ua la e Axel o le oo mai i Samoa nei o se tasi lea o auala o loo faia e le faletupe o le lalolagi ina ia mafai ona galulue faatasi ma talanoa ai foi auala e foia ai faafitauli o loo feagai nei ma paaga a le faletupe, o atunuu o le Pasefika.
