O lea ua matala mai le faitotoa o se isi atinae tāua tele mo o tatou tagata aemaise o fanau, e aoaoina ai gagana a isi atunuu.
E pei ona saunoa le taitai o le Malo le afioga i le Palemia i le tatalaina o le aoga mo le aoaoina o gagana a isi atunuu le Samoa School of Languages lea ua faatuina i Malifa i totonu o le lotoā o loo iai le Matagaluega o Aoga Taaloga ma Aganuu faapea isi aoga a le Malo.
O le gagana Saina ua amata ai lenei aoga tāua e pei ona taunuu mai faiaoga o le gagana a lea atunuu e toatolu ma o ni tamaitai uma.
Na maofa le au valaaulia ina ua faatino se aitema poo se item a le fanau o loo aoaoina i le aoga tulagalua i Malifa na faaaogā ai le gagana Saina, ona e maeu le lelei o le faaleoga o upu o lea gagana e le fanau.
O se aitema na aoaoina e tamaitai faiaoga mai Saina ma o le ofo tele o le Palemia ma le au valaaulia na toe avane ai le isi tamaitai aoga ma faatautala ane i le gagana Saina lea na alu ae ai le pati leotele o tagata ma faaalia lo latou fiafia.
O le mau lea ua momoli mai e le taitai o le Malo ina ua tatala faitotoa o lea aoga o le gagana, o le a mafai ai nei ona aoaoina lelei alo ma fanau a le atunuu e maua avanoa sikolasipi i Saina ma Iapani e aooga ai ona o atu lea ua iloa tautatala ma malamalama i gagana a ia atunuu.
O le gagana Farani, Siamani, ma le gagana Samoa mo i latou e lē silafia le tatou gagana o le a aoaoin ai foi.
Na faailoa i le sauniga e se tasi o sui o Malo mai fafo le ofo mai o se fesoasoani e aoaoina ai foi ma le gagana Sepania poo le Spanish pe a talafeagai ma fuafuaga a le aoga.
Na saunoa le Palemia susuga Tuilaepa Lupesoliai Sailele Malielegaoi, ma ia faaalia le tāua o le aoaoina o gagana a isi atunuu auā e le gata e lelei ai ona fesootai atu i ai, ae malamalama ai foi i tu ma aganuu a ia atunuu.
O se faafitauli tele lava lea sa feagai ma alo ma fanau a Samoa e maua avanoa sikolasipi i Saina ma Iapani, ona na saunoa le Palemia e uma le tausaga muamua e lē o lelei ona feagai ma aoaoga o tomai na mafua ai ona malaga ese ma Samoa ona o le alu atoa o le isi tausaga e aoaoina ai ma faamasani i le gagana a na atunuu, peitai lava o lea ua iai le laolao e faatino muamua ai le tulaga lea, a o lei o ese atu mo aoaoga.
E 30 avanoa ua ofo mai e le Palemia o le a totogi ai e le Pulega o Tagata Tafafao le Samoa Tourism Authority pili o i latou e lē gafatia le tau e aoga ai i le aoga mo gagana a isi atunuu.
O le aso 16 o le masina nei o Mati e amatalia ai vasega ma o loo ofo mai e le matagaluega o aoga le pili e selau tala i le taimi nei mo le toa selau muamua o tagata e lesitala mo le fia ulufale i le aoga.
O le Malo Saina ma Iapani o loo fesoasoani i le faatupeina o lenei aoga fou o loo i lalo o le vaaiga ma le pulega a le matagaluega o aoga taaloga ma aganuu.
