O se tasi lenei o faafitauli ua faaalia e le Pulega o le suavai ua faaiitiiita ai le suavai maua mai i vaitafe o le atunuu.
O le faaitiitia o laau o Samoa lava ia ma ua tau leai se suavai maua o vaitafe e pei ona vaaia i nofoaga o loo tapu‘e ai le suavai i le itumalo o Vaimauga.
O le tele o laau o loo ola i augutu o vaitafe, e lē o toe mafai ona taofiofi le suavai ona e lē o malosi aa ona e laititi lava se vaega o le eleele e gata ai le sosolo o aa o ia laau. E lē o loloto le sosolo a aa e mafai ai ona malosi ma taofi le eleele pe a tafe le vaitafe ma tafia uma atu ai lava ma le eleele pe a malosi le sua o le vaitafe.
O le tele o laau Samoa ua lē o toe maua o le latou galuega tele lea sa faia i tausaga ua mavae, o le tau taofiofi o le malosi o le tatafe o vaitafe ma e malosi aa o laau nei, peitai o le faaauau ona ta i lalo ae faatutū maumaga ma atina‘e tau faatoaga ua vaaia ai le mou ese atu o le tele o ia laau.
O tafega o le vaitafe o le Vaisigano ua manino ai lea tulaga i le sau atoa o laau ia e toto i autafa o vaitafe, sau ai ma le palapala i taimi uma e pa ai le vaitafe. E lē gata la ina solo le eleele ae ua tau leai se suava o toe mafai ona taofiofi mo le vaitafe.
O le isi faafitauli ua vaaia ona o le sosolo o laau e pei o le tamaligi i autafa o vaitafe, ua mamate ai ma laau Samoa sa taofiofia le suavai o loo maua i timuga, ma faasolosolo mai i vaitafe.
O le leai la o ni laau nei ua vave ai le sau sa‘o o le vai mai timuga ma iu ai ina pāpā vaitafe.
O le mafuaaga foi lea o le tulai mai o tafega faafuasei e pei ona vaaia i le lua vaiaso talu ai, lea na pa ai le Vaisigano ma maliu ai se tamaitai sa taele i le Loto a Samasoni.
Faaalia e le alii Ofisa Sili o le Matagaluega o Punaoa Faale-Natura ma le Siosiomaga, le Afioga Taulealeausumai Laavasa Malua, o le taumafaiga ina ia lapatai le atunuu e aua le tataina i lalo laau o loo ola i autafa o vaitafe, o loo faagasolo pea ae e iai lava tagata e usitaia, ae o isi foi e leai lava ma se fia faalogo.
Ua tolu tausaga talu ona amata se polokalame a le Matagaluega ina ia toto laau e miliona i totonu o le umi lenei e tolu tausaga.
O lea ua faaalia e le alii Ofisa Sili ua latalata lava ina ausia lea numera ae e lē taofia ai le taumafai pea e unai le atunuu ina ia saga toto laau aemaise le saili o laau Samoa e toto auā le taofiofia lea o le suavai ua maua mai i le timu.
