E toalua ni alii mai Niu Sila sa afea Samoa i le masina o Ianuari o le tausaga nei 2012. O le aso 3 o Fepuari na alu ai se la tafaoga i se tasi o fale kalapu i Matautu i Apia ma faapea ona fetaui ai ma le alii o Aleluia Falefata Fuapauna o Fusi Safata ma Vaitele-uta.
O le po lea o le aso Faraile 3 o Fepuari sa inu alii Niu Sila i le fale kalapu ma tafafao ai, ae oo atu ai ma le alii o Aleluia ma latou faamasani ma inu atu ai lava ma lea taulealea.
Na alu alu le inuga ma le tafaoga a le toatolu lenei ona fai lea o Aleluia i alii Niu Sila e 20 tausaga o le isi ae 18 le isi, latou te o i se isi fale kalapu e faaauau ai le latou evaga. Na taofi le taxi ma agai loa le tafaoga i le fale kalapu a le alii o Aleluia. Peitai na faatu le taavale ina ua taunuu i Mulivai lata i le ofisa o le pulega o tagata tafafao.
Na feosofi i fafo Aleluia ma alii Niu Sila ona savavali agai atu lea i le taligalu i le itu i tai ma sa muamua teisi i luma alii mai Niu Sila ae mulimuli atu Aleluia.
E lei leva ona alu le savaliga ae maua loa e Aleluia se maa ma ia faaaogā loa e tu‘i ai le alii 20 tausaga. Na palasi i lalo le alii lea ma oi i le tiga o ona manu‘a, ae toe liliu atu ua aveina le alii 18 tausaga i le maa.
Na palasi i lalo ma faasaga atu loa Aleluia ma vane taga o ofu ma ia aveesea ai se tinoitupe e $350 tala. O se sim card o se telefoni e tusa lona tau ma le $59.50, o se ato tupe o lona tau e $102 tala, o se Efpos Card ma se laisene ave taavale Niu Sila. O le alii 20 tausaga na mafai ona sola ese ma sulu atu i le leoleopo o le ofisa o tagata tafafao ma logo i ai le mea ua tupu ma faapea ona logo ai leoleo. Na faia suesuega ma maua ai le taulealea o Aleluia i le tuanai o aso e ono o faia sailiga.
E fa moliaga na molia ai e leoleo le alii o Aleluia ona o lana gaioiga na aafia ai alii mai Niu Sila ua lē faailoaina e le faamasinoga o la suafa.
O le moliaga o le faomea poo le robbery, faaoolima ma le faamoemoe e fao meatotino, le moliaga o le faaoo manu‘a ma le moliaga o le gaoi. Ina ua tulai lea alii ile faamasinoga sa ia ioeina uma moliaga.
O le lipoti i aafiaga o i laua na aafia na ta‘ua ai i se folasaga a le faamasinoga le ogaoga o manu‘a na aafia ai aemaise o le alii 18 tausaga na toe foi i Niu Sila mo ni togafitiga faafomai.
Na manino i le silasila a le faamasinoga o le gaioiga atoa na faia e Aleluia na ia faasese ai i laua na aafia i le fai i ai latou te o e faaauau le latou tafaoga i se isi fale kalapu ae sa iai lona faamoemoe e faatino ai se solitulafono.
O se itu lelei mo le alii ua molia lona ioeina o moliaga peitai e lē aveesea ai le matuia o lana gaioiga. Ua amata tuli nei lona faasalaga i le falepuipui e lua tausaga ma masina e ono.
E iai le moliaga o le gaoi sa molia muamua ai Alelulia i le tausaga e 2007 ma sa faamaonia e le faamasinoga.
