O le tamaitai Pasefika, ae o se alo o Samoa, o Vania Lavea, sa taaalo muamua foi i le aulakapi a tamaitai Niu Sila, le Black Fern, ua ofi atu nei o ia o se tasi o sui fou a le Iuni Lakapi a Niu Sila (NZRU), ina ua tofia o se tasi o tamaitai ofisa o le Iuni e galue i le vaega o loo atina‘eina le tomai lakapi mo tamaitai i totonu o le atunuu (Womens Community Rugby Development Officers).
O le tamaitai o Lavea o le a nafa ma faaitu tetele ia e aofia ai Taranaki, Waikato, Bay of Plenty, Counties-Manukau, North Harbour ma Northland.
Faaalia e Lavea lona matuā fiafia i lenei tofiga ua ia maua, ma faapea mai o le galuega lenei ua leva ona moemiti ma moomoo e fia galue ai, ma o se matuā mitamitaga mo ia le maua ai o lenei avanoa tele. O le tamaitai o Lavea e tupuga mai ona aiga i Safotu & Laulii, ma o le a faamavae ese mai lana galuega sa galue ai mo le Kolisi a Lynfield College, lea sa avea o le Sports Co-ordinator mo lea kolisi i ni tausaga ua tuanai.
O loo avea nei Lavea ma faiaoga o le aulakapi a tamaitai o loo siamupini i le taamilosaga a le NPC, le Auckland Storm, ma sa lagolagoina foi le faauluina atu o lona suafa e faia i ai le filifiliga o se Faiaoga o le Tausaga (Coach of the Year) i tufaga faailoga a le Samoan Sports Awards, e pei ona sa faia i Aukilani.
