O le vaiaso ua tea na toe amatalia ai fonotaga a le Palemene a Niu Sila mo le tausaga 2013. E tatala lea fonotaga i tausaga taitasi i le Saunoaga Autū a le Palemia. O le masani lava o lea saunoaga e fofola mai ai e le Palemia galuega ma fuafuaga faataatia a le Malo ua latou fuafuaina e ave i ai le latou faamuamua i lenei tausaga faigaluega.
E mae‘a loa lea saunoaga autū ona lauga tali loa lea i ai o sui o le itu agai ma e 15 itula e faaavanoa e tulafono faavae e faaaogā e le Maota Fono mo lea felafolafoaina ma e 10 minute o loo avanoa e fai ai lauga taitasi a sui faipule.
Na tofia a‘u e le matou vaega e lauga i faigalauga muamua ina ua mae‘a ona tali i le Malo le taitai o le Itu Agai. Sa ou faaalia i lea lauga lo‘u lē fiafia i le alii Palemia ma lana faigamalo ona o mafuaaga nei.
Muamua, na amatalia lana faigamalo i le faaiuga o le tausaga 2008 o loo maualalo le fuainumera o le aofai o tagata ua leai ni galuega (unemployment) ma e 3.7 pasene sa iai. A o lea ua oo mai i le tausaga 2013 ua oo i le 7.3 pasene le aofai o tagata ua leai ni galuega poo le 175,000 tagata (unemployed).
E aupito i sili ona maualuga le fuainumera o tagata Maori (15.1 pasene) ma tagata Pasefika (15.6 pasene) ua leai ni galuega. Ua ou faalogo atu foi i le saunoaga autū a le Palemia e leai, leai lava se fuafuaga maumaututu ua faataatia mai e le Malo o le a foia ai le toatele o tagata ua leai ni galuega.
O le taimi nei o loo iai tagata ua leai ni galuega ma e leai se fesoasoani a le Malo mo ia tagata. O nisi na vaea mai galuega i tausaga ua te‘a ma e oo mai lava i lenei taimi e le i toe maua seisi galuega. Afai foi e maua galuega, na o galuega faavaitaimi, poo galuega part-time poo le casual.
A o ia foi galuega e maualalo lava totogi, e le mafai ona tausi faalelei ai ni aiga i iai ituaiga galuega. Ia te au lava ia ma la‘u vaai ia Niu Sila, ua faafoliga o le toatele o tagata Niu Sila o loo faigaluega i galuega e umi itula, maualalo totogi maua, ma ua fiu lava e faigaluega ae ua leai se lumanai lelei e maua ai, e pei o le olaga o se tagata pologa.
O lona lua, o le vaega o loo ave i ai faamuamua a le faigamalo o latou o loo maua mea – le aufaipisinisi tetele. Ma o latou foi lenei o loo vavalalata latou faiga faapaaga.
O lea lava o loo manino i le silafaga a le Atunuu o le galuega muamua lava a John Key ma lana faigamalo na faia o le fesuiaiga lea o lafoga totogi a le aufaipisinisi ma le aufaigaluega.
E tulai mai le faigamalo a Key i le faaiuga o le tausaga 2008 o le maualuga o le lafoga totogi a le tagata faigaluega i lana totogi maua o le 39 pasenei le tala mo latou e maualuga o latou totogi maua. Ona sui lea e Key ma lana faigamalo ma faapa‘ū ai lea lafoga i le 38 pasene i le masina o Aperila 2009, toe faapa‘ū foi i le 33 pasene i le masina o Oketopa 2010.
A o le lafoga sa masani ona totogi e le aufaipisinisi na faapa‘ū e Key ma lana faigamalo mai le 45 pasene sa iai i le 33 pasene ina ua tulai mai i le faaiuga o le tausaga 2008, ona toe faapa‘ū foi lea i le 30 pasene mai le tausaga 2009, toe faapa‘ū i le 28 pasene i le tausaga 2012.
E ui na ia saunoa i le tausaga 2008 a o fai ana faiga kemupegi e lē suia e lana faigamalo le lafoga o le GST, peitai ane ina ua faataunuu e lana faigamalo le fesuiaiga o lafoga e pei ona ou ta‘ua i luga, o lea na toe sii ai le GST mai le 12.5 pasene sa iai i le 15 pasene o loo iai nei.
O le mea ua tupu mo le toatele o aiga e vaivai le tamaoaiga ua lē gata i le maualalo o tupe maua, ae ua alu i luga le maualuga o le tau o le soifuaga, ma ua atili ai lava ona faaletonu le tausiga o le tele o aiga.
Ua toe faaopoopo ma fesuiaiga o loo faasavali pea e le faigamalo a Key ina ia toe faatulagaina ma fesuiai le faiga o penefiti ma fesoasoani faalemalo mo latou e leai ni galuega (unemployed benefit); o latou o loo maua i mai o le tino (sickness benefit); aiga e toatasi le matua o loo tausia se fanau (solo parent benefit) ma le penefiti mo le autalavou (youth) ua lē o toe aooga ma e lē o faigaluega foi. Ua atili ai lava ona faigata le tausiga o aiga.
O le olaga lava i Niu Sila e tāua le iai o lau galuega. E tāua foi le lelei o le totogi o lea galuega. E maua le galuega e lelei le totogi pe afai lea e iai sau faailoga maualuga mai le aoga e pei o se tikeri poo se tomai faapitoa i se matata e pei o le inisinia, kamuta, eletise poo le palama foi.
Peitai ane, o nei avanoa, aemaise o avanoa mo aoga maualuluga, ua faafaigata talu ona tulai mai le faigamalo a Key ma lana vaega.
Ona faaiu loa lea o lau lauga faapea, ou te matuā talitonu o loo toatele aiga i Niu Sila ua lagona le sese o le latou filifiliga sa fai mo John Key ma lana vaega e avea ma faigamalo a Niu Sila. Ua iai foi le suiga o lagona o tagata lautele.
Ma o le suiga o lagona o tagata ua iai nei i Niu Sila lea na fofogaina e se tasi o tagata faipisinisi lauiloa i Niu Sila i le vaiaso ua tea ina ua ia faapea mai – pau lava le mea e fai o le sui o le Malo. Ma o le luitau lea ua iai mo tatou a o faagasolo galuega o lenei tausaga.
