Ua tele faaili Samoa o loo tautua i Sini nei, Melepone ma Perisipeni e ala i Siva ma koneseti, sailiga seleni a mafutaga, ekalesia i Ausetalia nei ma afioaga mai Samoa. O le mau a le toatele e sili lava le saasaa i se faaili lelei i loo le DJ ma isi masini.
I totonu o Melepone ua vaaia ai le manuia o le taumafaiga a se tasi o faaili talavou ua faaigoaina o le T-Rhythm poo le Togoaasa (Moataa).
Na o le fā tausaga talu ona faavae le T-Rhythm e le afioga Fiu Toatasi Mataupu (Moataa)) ma le faletua ia Leone Mataupu (Nofoalii).
Saunoa Fiu Toatasi Mataupu, na amata mai le taumafaiga a nai ona alo ma o latou tei i le faafiafia i Siva Samoa ma sailiga seleni eseese i totonu lava o Melepone ae peitai o le toatele o isi faaili a nai uso Samoa na amata saili avanoa ai le T-Rhythm i se isi maketi o faafiafiaga.
O le 2009 na talimalo ai le faaili i le malaga mai a Vaniah Toloa mo le faamoemoe o le FM89.3 i Sini. Na pau lea o le taimi na asiasi mai ai Vaniah i Ausetalia.
O le taimi nei ua soo Sini, Melepone ma Perisipeni o asiasi i ai le T-Rhythm i ni valaaulia mo faaipoipoga, aso fanau ma sailiga seleni.
E le gata i lea na siamupini i le Pool-A o le 2008 i se tauvaga faaili tuufaatasia e le Kalapu o le Hallam Hotels i Melepone.
E toasefulufā faaili na tauva mai soo se atunuu ae na tulaga lua ai le Togoaasa i le palota e tasi. O lea tauvaga na amata amanaia ai e faaili ma tama pese iloga mai Amerika, Hawaii ma Niu Sila na malaga mai.
O nei faaili asiasi mai a Niu Sila e aofia ai le KATCHAFIRE lea ua lauiloa i le lalolagi. Ua faatolu na masii mai le Katchafire i Melepone nei ma faafiafia ma le T-Rhythm.
O le isi faaili mai Niu Sila ua faalua na asiasi mai ma pepese ma le T-Rhythm o le House of Shem faapea le Sons of Zions (1). Ua mafai foi ona silasila le atunuu i koneseti a le T-Rhythm i luga o le facebook ia latou faafiafiaga.
O le alii pese Samoa iloga mai Amerika o J-Boog lea foi na malaga i Hawaii, Samoa Amerika ma Niu Sila ua malaga mai foi ma pepese ma le T-Rhythm. E pei ona silafia o J-Boog o se tama Samoa pese Reggae uigaese le moomia e tagata.
Mai Niu Sila na tuufaatasia lenei faaili iloga mai Melepone ma le Nesian Mystik mo se koneseti matagofie lea e toatele nisi na molimauina.
Na fesootai mai foi faaili iloga mai Hawaii e pei o le Kolohe Kai ma le isi faaili o le Rebel Souljah.
E tatala foi le avanoa e Fiu ma le faaili i uso a faafiafia mai soo se setete i Ausetalia e pei o le PAUA Band ma le faaili o le SPECIFIX mai Perisipeni.
O uso foi mai Tonga le faaili o le 3 Houses Down na tuufaatasi ma le T-Rhythm ma faamalosia ai le nofo fealofani a fanau o le Pasefika i Ausetalia.
O sui nei o le faaili a le T-Rhythm: Paul Soo Taito & Richard Taito (Lead Vocals), Junior Taito (Rhythm Guitar/Vocals), Daniel T. (Bass), Nga Metuai (Drums), Jason Davis (Lead Guitar), Fiu Toatasi Mataupu Taito & Leone Mataupu Taito (Managers).
Ua amata nei foi le 2013 ma le pisi o le kalena a le faaili ma ua faailoa mai e le Alii Pule Sili afioga Fiu Toatasi Mataupu ma le faletua ia Leone, o le faaiuga o Mati o le a toe asiasi mai ai i Sini le T-Rhythm auā se faafiafiaga aemaise se faamoemoe tele i le POLY CLUB i Liverpool.
