O le vaiaso na tuanai atu nei na faailoa faalauaitele mai ai e le tamaitai Palemia o le malo tele o Ausetalia, o le a faia le palota mo le faigamalo tele i le aso 14 o Setema o le tausaga nei.
O le vaitaimi foi lea o loo taumate nisi o sui faipule faa-Setete, e ono fai ai le palota faa-Setete (State Election) mo Vitoria.
O le ala lea ua amata tapena ai sailiga seleni a nisi o sui faipule o iai nei, auā le taimi e aasa ai faigamea i le tai, o se itu lelei ua maitauina, o le faasalafa lea o le faatāuaina e sui faipule, o faalapotopotoga ma tagatānuu mai atunuu eseese e aofia ai ma atumotu o le Pasefika.
O le afiafi o le Aso Toonai na tuanai atu, na molimauina ai le faatumulia o se tasi o malu tele i le pitonuu o Cambellfield, sa faataunuuina ai le faamoemoe saili seleni o se tasi o sui faipule, lea na valaau faaaloalo ai i le Voice of the Pacific e fai ma sui o atumotu o le Pasefika.
Na faatumulia le malu i le maave eseese faapalemene, e le gata i le malo tele, a o le malo settee.
Faaalia e le afioga a Fepuleai Alesio le taitaifono o le Voice of the Pacific, o le amataga lea o faigapaaga a tagata Pasefika ma le tele o sui faipule maualuluga o le malo tele ma le setete, auā e tāua le sootuli ma sootauau ma i latou o nofoia nofoa o faigamalo, e alagofie ai fesoasoani mo Samoa o aumau i Melepone, aemaise lava le tupulaga fai mai.
Na ia saunoa foi, o avanoa faaauro nei, e faalototele ai i alo ma fanau, ina ia finau e tauva mo sui faipule faasetete, ma oo atu ai lava i Canberra, le fatu o le faiga malo tele a Ausetalia; “Ia talosia ia.”
