O le masani lenei a le Malo o Samoa i le amataga o tausaga taitasi a’o lei toe amatalia ai le tele o galuega a le Malo ma le atunuu, o le faatautaia ai lea o se sauniga Lotu e amata ai le vaiaso tatalo ma le anapogi mo le atunuu atoa ina ia talosia ai le faigamalaga a Samoa mo le tausaga atoa. Na vaaia ai le tumutumu o le Maota Tatalo a le Malo i Palisi i le afiafi o le Aso Sa na tea nei, e lē gata i Minisita o le Kapeneta, o faipule o le Palemene, o Ofisa Sili ma faauluuluga o Matagaluega eseese a le Malo faatasi ai foi ma sui o Ekalesia taitasi na auai uma i lea sauniga lotu.
O le sauniga lotu lenei na faatautaia ai e le Fono a Ekalesia Soofaatasi i le atunuu e pei ona sa ta’ita’ia ai e le ta’ita’ifono ia Kasiano Leaupepe, o le tatalo na saunia lea e sui o le Fono o Ekalesia Soofaatasi i le atunuu e pei ona iai le susuga i le faafeagaiga ia Rev. Maauga Motu, Rev. Talomua Mona ma Rev. Tanielu Taupaū.
O le faitauina o le Tusi Paia na gafa lea ma le faletua ia Elisapeta Faranisisi Asiata ma le lauga na saunoa i ai Rev. Mautofu Fuimaono. O le aufaipese a le Faalapotopotoga o Inisiua a Samoa (Samoa Life Assurance Corporation) ma le Faletupe o Atina’e a Samoa (Development Bank of Samoa) na gafa ma le lagiina o viiga o le Atua.
O le autū o le lauga i lea sauniga lotu, “O mea sili e ala mai i mea iti “(The best things come from small parcels). O se autū na matuā faamanuiaina ai le toatele o i latou na auai i lea sauniga lotu. E ese foi lagona o le toatele na auai i le sauniga lotu lenei faatusa atu i sauniga lotu o tausaga ua tuanai, aemaise o le tūtū faatasi ai o Ta’ita’i o le atunuu ma ta’ita’i o Ekalesia ina ia talosia ai le faigamalaga a Samoa mo lenei tausaga.
Ta’ua foi e nisi o sui faipule o le Palemene a Samoa na auai i lenei sauniga lotu, e telē le tāua o le sauniga lotu lenei e tatala aloaia ai le vaiaso o anapogi ma tatalo a le atunuu, ae o se sauniga lotu foi e aumai faatasi ai loto uma o le atunuu ina ia tagi atu i le Atua mo lana puipuiga i le faigamalaga o lenei tausaga 2020.
E pei ona silafia e tele nisi o faafitauli na osofaia ai le faigamalaga a Samoa i le tausaga na tea nei aemaise lava i le faama’i lenei o le misela e pei ona maliliu ai le toatele o fanau a le atunuu, ma o le tatalo foi lea a auaunaga a le Atua i lea sauniga ina ia alofagia e le Alii le folauga o lenei tausaga ina ia tafiesea ni mala o fotua’i mai ma afaina ai le faigamalaga o le 2020.
O le naunautaiga foi lenei a ta’ita’i o le atunuu e mafua ai ona ave le lagolago a le Malo e faatautaia ai le vaiaso o tatalo ma anapogi, ina ia manuia le folauga a Samoa i le tausaga atoa.
O le vaiaso lenei na amata ona faatāua mai lava i le vaitau na palemia ai Tofilau Eti Alesana ina ua fautuaina ai e ta’ita’i o nisi o Ekalesia Kerisiano ta’ita’i o le Malo i le vaitau na sosoo ai le afā o Ofa ma Valelia lea na matuā faaleagaina ai le tele o vaega o le atunuu. O iina tonu na manatu ai Alesana ina ia faamaualalo uma ai ta’ita’i o Samoa ma faataunuu ai se vaiaso e tasi mo anapogi ma talosaga e faatoga ai i le Atua mo lana puipuiga i luga o le atunuu, lea lava e oo mai i le taimi lenei o loo faaauau pea e le faigamalo o iai nei a le HRPP.
Na auai foi i lea sauniga Lotu le Ao Mamalu o le Malo o Samoa ma lona Masiofo, Tuimalealiifano Vaaletoa Sualauvi II, o le Afioga i le Alii Palemia susuga Tuilaepa Sailele Malielegaoi ma le Faletua. O le faaiuga o le vaiaso lenei ua faamoemoe e tapunia aloaia ai lenei vaiaso o Anapogi ma Talosaga.
