Ose taleni suisui ma mamanu na faasoa mai e lona tina i Samoa a o tuputupu ae ai le tamaitai o Monika Apaula Seumanutafa, ua avea ma mafuaaga na unaia malosi ai lenei tamaitai e ausia lenei miti. Ole Aso Toonai talu ai na valaaulia ai le mamalu ole atunuu i Sini nei ma aiga ile fiafia ma se taumafataga e faailoa ai le auaunaga a ‘Le Apaula Outfit Décor’.
Ole susuga ia Tito Schmidt Stowers o Vaimoso ma Safotu ma lana ausiva mataina ole S.O.T.I Spirit of the Islands, sa faafiafiaina le aofia i siva Polenisia ma faasamoa ma atili faaopoopo ai le lanu eseese o vaaiga o lea afiafi. Na maofa sui valaaulia mai isi atunuu na auai ile mamafa ole taumafataga na saunia ma teuga eseese e o lua ma le agaga masani o Samoa ole talimalo. Na saunoa le tamaitai pule ia Monika Apaula Seumanutafa o Falealupo, Iva, Manono, Niue, Matautu, Apia e le gata i tatou tagata a ua galulue nei ma se tasi o tamaitai Aferika ia faasoa atu i isi tagatanuu le auaunaga.
Sa molimauina i o latou laei ma ona alo tamaitai le aulelei o elei Samoa ma mamanu sa o latou eleiina faapea i teuga ole maota ma laulau aemaise nofoa ole aso. Ole nofoaga 67 Cardwell Parade i Yagoona lea ua faagasolo ai lenei tautua ma ose auala e sui ai le filifiliga a o tatou tagata i oloa i fale Asia, Initia ma Arapi o faatauina oloa Samoa pei o ofu ma tautaliga ma isi.
Sa saunoa faamalosiau ai foi le Peresetene ole Fono Aoao a tagata Samoa ile aofia, ile taua tele ole lagolago lava e o tatou tagata o nai o tatou pisinisi aua e toe foi la latou fesoasoani i nai aiga Samoa, o ekalesia ma afioaga.
Na taualuga le po ile Siva Samoa ale aofia ma faamanuia ai le keke ole aso Fanau ose tasi o alo ole tamaitai pule, le susuga ia Jordan Semanutafa ose alii pese e logologoa i lona igoa ia Jay-King. Sa auai ai foi le fanau teine ia Adele 15 ma Adeline 11 faapea le alii o Jazhannah 2, vagana ai Joe Seumanutafa sa feagai ma galuega.
