Ole toe faatasia o Samoa i Sasae ma Samoa i Sisifo e le ose mea e faigofie. Ole finagalo lea ole afioga ile Palemia susuga Tuilaepa Lupesoliai Sailele Malielegaoi ina ua fesiligia e toe faalautele sona finagalo na faaalia muamua na ia taua ai e faapea, ole mea sili ona taua ia te ia ole fai lava ole Malo o Tutuila ma Manua, fai foi le Malo o Samoa Tutoatasi.
“Ose mea lelei pe a lua o tatou leo ile saofaiga a Malo tetele ole lalolagi, e lua ai foi a tatou palota”.
Na faaalia e Tuilaepa ai seiloga ua alualu ise isi aso toe faatasia Samoa aoao e pei ona fesiligia ile toe faatasia ai o Siamani i Sasae ma Siamani i Sisifo lea ua toe tasi ai faigamalo ma pulega i totonu o lea atunuu malosi ole atu Europa.
“O la e lua foi Malo o Korea i Saute ma Korea i Matu, Saina foi e ese le pulega a Saina Taiwan ma isi lava atunuu oloo faapena ona vaeluaina ma eseese faigamalo ae o Samoa lava ia ole lelei ole fai lava ole Malo o Amerika Samoa fai foi tatou, a tafe ane le manuia i o (Tutuila ma Manua) e tafe mai foi iinei, ae a tafe mai le manuia i a tatou ona nofonofo ai lava lea i lenei itu”.
Na soisoi le alii Palemia i lona finagalo lea ae ole auga atoa o sona finagalo faaalia oloo lelei lava le tulaga ua iai nei Samoa e lua.
Oni tausaga ua mavae sa aliae ai se lagona ile faaono toe faatasia o Samoa i ana faigamalo e lua.
O ia lagona na afua mai ina ua laumanuia se fuafuaga e ono faatino e le Malo tele o Amerika ole faamatuu ese o atunuu oloo avea ma ona teritori ile lalolagi aemaise lava ile Pasefika.
Ose isi foi lea o lagona oloo mapuna mai ile fefaaaliaiga o taofi ma finagalo pe faapefea ona tu toatasi Amerika Samoa e alai le pulea lava e ia motu ole atu Samoa o lona lumanai ona e itiiti tele motu ma e le tutusa ma motu tetele oloo ile lio o Samoa Tutoatasi.
Peitai ole finagalo ole Palemia ile feiloaiga ma tusitala ile vaiaso ua mavae i lana faatalanoaga masani ma le leitio ole 2AP na manino mai ai, e leo iai se naunautaiga o taitai o Samoa i Sisifo e toe tuu faatasia motu uma o Samoa ma ona tagata i lalo o se pulega e tasi e pei ona sa iai muamua, ao lei vavae ese Tutuila ma Manua ile pulega a Amerika, ae ave Upolu, Savaii ma isi motu laiti oloo i sisifo i pulega faakolone a le Malo o Siamani seia oo ina solomuli lea Malo ae agai mai Niusila ma pulea ma taunuu ai ina tutoatasi ile amataga ole tausaga e 1962.
