Ole aoauli ole Aso Sa, 8 o Ianuari na tapa ai ipu ole suafa Muliagatele ile susuga ia Shiu Singh ole pule lea ole faletaavale ole Henderson Cars faapea le susuga ia Mary Keil ma Bernie Miler, faatasi ai ma le suafa Tupai ile susuga ia Albert Silva ma Fale Peato Lafaitele faapea le suafa Toomata ile susuga ia John Raki, ile maota o Tuala Nia i Magele.
O nei suafa matai ose finagalo na a‘e ia Tuala ma Sala ma le aiga potopoto i Kava Kele i Leauvaa e tatau ona tapa ipu o suafa o nei tamalii oloo aumau i Niu Sila faatasi ai ma le faaaloaloga maualuga ale aiga potopoto e tuuina atu lea ile susuga ia Shiu Singh manu o maua le avanoa oloo malaga mai ai i Niu Sila le aiga i nisi o fuafuaga ale nuu ma le ekalesia na mafua ai ona malaga mai.
O lenei faamoemoe sa auai le Sa‘o ole aiga ia Tuala Enele, Tuala Nia, Tuala Oli, Sala Lesi ma nisi ole aiga potopoto na malaga mai i Samoa faapea ma nisi o suafa oloo aumau i Niu Sila nei. Ole tuuina atu ole suafa Muliagatele ile susuga ia Shiu ose faaaloalo maualuga lea ale aiga i Kava Kele mo lea foi tamalii ona ole tele o ana galuega lelei ua faia mo Samoa ma ona tagata.
E ui lava la e le ose tagatanuu moni o Samoa, ae ole faaaloalo ile tagata ua tatau iai le faaaloalo e pei o upu ale atunuu.
O ana galuega ma le tele o lona alofa ia Samoa, aemaise ai o lona fesoasoani malosi ile faamoemoe ole ekalesia Katoliko a Faleula na malaga mai ile amataga ole tausaga na mafua ai ona a‘e se lagona i lea aiga potopoto e tatau ona toina atu se matupalapala ale aiga potopoto i Kava Kele mo lea foi tamalii e talimasineia ai lana tautua matavela ia Samoa. Aua ua le tasi ae ua atulasi lana auaunaga i faalapotopotoga, ekalesia ma nuu aemaise i soo se mea e fai a Samoa.
Ole Aso Sa oloo lumanai nei, o lea ua taoto ai se fonotaga ale aiga potopoto ile maota ole aiga i Kavatele i Samoa e talanoaina ai suafa matai o i latou nei ua mae‘a ona tapa ipu, ma faamautuina ai polokalame ale aiga ile masina fou ia Fepuari e aloaia ai nofo ale aiga ma faatinoina ai loa faaaloaloga masani a Samoa e pei ona masani ai i lana aganuuu, aemaise ai ole resitalaina o suafa o i latou nei faaletulafono.
Finagalo o Muliagatele Shiu
Faaalia le finagalo ole susuga ia Shiu, na ia lagona lona fiafia tele ina ua talanoa atu le Sa‘o ole aiga ia Tuala Enele ma nisi o suafa ole aiga, ole a tuuina atu le suafa matai mo ia, ma sa faamalamalama ai foi e suafa ole aiga le mafuaaga ua tuuina atu ai lea suafa matai, ona ose faaaloalo maualuga lea mo ia i lana tautua mo Samoa.
Na ia taliaina ma lona agaga fiafia lea faaaloalo, aua ole tele o mea e faatino i totonu ole komuniti a Samoa e auai atu ai ma ia vaavaai ai foi ile faatinoina ole aganuu a Samoa.
E tele lona lagolago i soo se mea e fai ia Samoa ma ole tele foi lea o lona silafia ia Samoa ma ona tagata.
Faailoa e Muliagatele Shiu o lona pale ai ile suafa matai ole aiga, ua suia ai lagona ua ia maua, ua fiafia ai e laei i laei faa-Samoa i totonu ole galuega i lona naunautaiga, ia silafia ai e tagata Samoa ma le Pasefika e agai atu i lana kamupani o ia ole matai Samoa ae le gata i lea o lona auai atu i ekalesia ma soo se mea e fai ia iloa lava o ia ole Samoa i lana tu, savali ma lana tautala.
Ua ia sauni foi e lagolago ma tautua malosi lona suafa matai i totonu ole atunuu e ala i soo se manaoga e fia maua ai le fesoasoani e o tatou tagata Samoa.
