O le tele o ausavali o le mafutaga a le Walking Samoans i Aukilani tainane fafo atu e iai Palmerston North ma Porirua, ua toe amataina uma mo le nei foi tausaga 2019.
O le itu matagofie, ona o le amata o le tausaga fou i nisi o fu’a taualuga poo laasaga ua mafai ona oo iai ma ausia e nisi o mafutaga. E pei la o le mafutaga a le ausavali poo le Walking Samoans a Mangere Bridge, o lea ua tauaaoina la latou toniga o jackets savali pei ona talosagaina ai e faatonu, Teleiai & Sooalo, i le Local Board a Mangere ma Otahuhu… O le afiafi o le Aso Gafua, 11 Fepuari ua faataunuuina ai lea faamoemoe.
Ua lē avanoa le ta’ita’ifono o le Local Board a Mangere & Otahuhu le tofa ia Lemauga Lydia Sosene mo le nei faamoemoe, ae o lea ua faailoa mai le auai o sui (local board members) le tofa ia Tafafunai Tasi Lauese ma le susuga ia Walter Togiamua. O le naunautaiga o faatonu, e lē faapumoomoina le faaaloalo ma le tali mai a le Local Board pei ona talia ai le talosaga mo ni toniga savali a le Walking Samoans, o le ala lea ua valaau faapitoa ai le pulega faalotoifale (local board), latou te tauaaoina aloaia la latou faaaloalo i aao o le ta’ita’i o le Walking Samoans i Mangere Bridge, le tamā matua poo le Tofa ia Tuaifaiva Lameko (79yrs) aemaise o le mamalu o le au savali poo le Walking Samoans a Mangere Bridge.
O nisi tala matagofie, o lea foi ua faailoa mai o le a valaaulia foi le Local Board a Otara i le Aso Tofi, 14 Fepuari, i le faamoemoe foi o Otara latou, o lea foi o le a taulimaina e Otara la latou togiga, o jackets savali, pei ona agalelei mai ai le Local Board i le talosaga atu a Teleiai & Sooalo auā ni jackets savavali mo le Walking Samoans a Otara. Saunoa le ta’ita’i ia Magele ma le afioga ia Laufili, aemaise o le faafeagaiga ia Rev. Faasaumalii Atonio o nisi o tino matutua o le mafutaga a le Walking Samoans i Otara o le tu ma le aga a Samoa, e lē maua ula futifuti ae maua sula.
O le ala foi lea o le valaau aloaia ai o le Local Board a Otara, auā le tauaaoina o le toniga mo le Walking Samoans a Otara, ae o se avanoa e fia molimoli ai se leo vaivai o Teleiai & Sooalo ma Otara, e lē gata e faafetai mo le toniga a Otara, ae faapena e tusa o le amanaia o se faatalauula…aua le atunuu savavali e ala i le faatofalaiga a le Walking Samoans.
O se molimau foi mai fafo atu o Aukilani, o loo faapena ona sologa lelei le savali i Palmerston North, le tamaitai ia Florence ma si ona tuaa le fetalaiga ia Fata, aemaise o le savali lea e lē na o Samoa, e toatele isi atunuu (mix) o loo auai e pei o Fiti, Niue, Maori ma nisi o papalagi.
O le savali i Porirua i le tofa ia Maee Siaosi Anamani, ma le Susuga i le A’oa’o ia Martin Mariota, o loo faapea ona agai pea i luma le maopoopo aemaise o le savali lea na savalia le sau i Palmerston North seia o i Porirua mo aso e tolu i le agai atu i le faaiuga o le tausaga ua mavae ona o le faatauaina o le soifua maloloina o le pasefika.
O loo faaoo mai foi se valaau faailoa mai i ta’ita’i o Porirua ia Teleiai ma Sooalo, e faailoa mai ai tapenaga mo le latou anniversary o le atoaga o le tausaga talu ona faavae le Walking Samoans i Porirua pei ona la oo atu ai mo le tatalaina, ia Fepuari o lena tausaga 2018.
O savali eseese uma a le Walking Samoans, o loo ua maitauina le toe vaaia o foliga lalelei ma foliga fiafia o nai toeaiina ma na i loomatutua, ua toe amataina le nei mafutaga matagofie, e lē gata o le maua ai o le soifua maloloina, maua ai le faamalositino, ma le malosi faafouina, a’o le avanoa foi e toe faauma ai ni aga o totoe o nai lālaga na amata i le 2018…ua faauiga ina ma faaupuina i le gagana Samoa… o le faikakala…hehehe
O le Walking Samoans i Clendon lea foi ua sui le auvaa o le nei tausaga, ua tulai mai ai le tofa ia Tevaga ma lona soatau le Afioga ia Toleafoa ae faafetaia ai le ta’ita’iga a le tama matua ia Tutagalevao Tai ma lona auvaa i na tausaga ua alu.
O le Walking Samoans i Avondale a le Whau Ward, ua sui tofi o le laulau, ua seei mai ai i le ta’ita’ifono le Tofa ia Tulitao Ene Lematua, ae sui ta’ita’i ai le Afioga ia Sa’u Satala Laauli, o le aao tusitusi o le faletua ia Susie Savaiinaea Taase Smith le teuoloa, le Afioga ia Laauli Gatoloai. E momoli foi le faamalo ma le faafetai i le tama matua ia Pepe ma lona auvaa le tofa ia Solofua ma le latou foi laulau, e tusa o le tautua ma le tu ai i le foe i tausaga ua mavae. O loo tumau pea ma le latou fomai ia Magele, e lei malosi ai lava se ma’i.
