E $6 miliona tala Samoa le tau atoa ua fuafua mo le galuega toe faaleleia mo le Falemai Tele o Malietoa Tanumafili II i le afioaga o Tuasivi.O se galuega o lea faatoa faia lava talu ona fai lenei falemai i le fesoasoani a le Malo o Iapani i le tusa lea ma le 20 o tausaga talu ai.
O le faaiuga la o le vaiaso na agai atu ai le Malo i le Alii Palemia ma lana Kapeneta atoa ai sui o le Palemene faapea le matagaluega o le soifua maloloina e molimauina le aloaia o le amataga o lea faamoemoe.
O le saunoaga a le alii Palemia, Susuga Tuilaepa Lupesoliai Sailele Malielegaoi, o le unai lava lea ua ave ai pea e le Malo le faamuamua i aoaoga faapea ai ma le soifua maloloina ma o le faatāua ua ave e le Malo i le va galulue faatasi ai ma ana paaga mai i fafo ina ia mafai ona fausia fale mo le faatinoga o nei auaunaga ma le faaleleia.
O le galuega muamua o le falemai tele i Tuasivi, na fausia e Iapani ae o le faafouga atoa lenei ua faatupe e le Malo o Niu Sila. O le faafetaia foi lea a le alii Palemia, o le tali mai o paaga nei i taumafaiga a Samoa e atiae ma o le taulai lava ia lelei foi nofoaga e mafai ona ofo atu ai auaunaga i le mamalu o loo i soo se itu o le atunuu, e pei ona iai i latou i le motu tele i Salafai.
O le galuega tele lea ua faapea ona manumalo ai le konekarate faufale a Ah Liki Construction ua fuafua e valu masina e faatino ai. O le tusia o le ata ua avatu i le konekarate a le Stevenson & Turner ma o le masina o Tesema o le tausaga nei lea ua ta‘ua.
“Mea tetele ia e lua e faavae ai fuafuaga mamao a soo se malo e pei o le tatou malo. O le ā le lelei aoaoina o se tama poo se teine ua foi mai i fafo ae lavea loa i gasegase uma le soifua, le aoga atoa le investment, le taimi na aoga ai. Ae o le a foi le soifua maloloina ae faavalevalea, e leai foi se aoga, o lona uiga o le tama lena o le a avea ma sasa i totonu o afioaga i le solitulafono.”
“O le ala lena o le ave o le faamuamua i aoga tulagalua, ma toso mai ai faalapotopotoga mai i fafo e aumai seleni e fau ai faleaoga a le atunuu, ma o lea ua tatou potopoto i le asō, le faafou o le falemai lenei, amata atu i le aso a taeao, amata le galuega ua amata foi ona tuai ae e tatau ona oo atu i le isi 50 tausaga ua lelei atu le falemai i Salafai nai i lo Upolu,” o se saunoaga lea a le alii Palemia.
O le a vaevae lelei ai falemai eseese ona o le taimi lenei o loo vaai uma lava soo se gasegase i le nofoaga e tasi i Tuasivi i le taimi lenei.
O le faaaliga a le alii Palemia, o le galuega fou o le a tuu ese ai le nofoaga mo faalavelave faafuasei ma potu tigaina, o le a tuu ese le falemai fa‘i nifo, aveese le nofoaga o faata ma suesuega. O le vaega lava ia o gasegase tau savali o le a faapea ona toe fausia faalelei. E lē gata i lea o le nofoaga mo faamaumauga o le a faafou atoa foi.
Faaalia e le alii Palemia o le faatino foi o galuega faalelei pe a vaaia le siisii o le faitau aofai o le atunuu ma o le vaaia o le siisii o le numera o le mamalu o le atunuu i Puleono lea ua manatu ai e talafeagai le toe faaleleia o lenei auaunaga tau soifua maloloina i totonu o Savaii.
Sa faapea foi ona tatala aloaia le falemai o le itumalo o Sataua i le vaiaso na tea nei ma o le galuega lea na faatupe e le Malo o Ausetalia. O le vaiaso la lenei ua amata ai le galuega auā le toe faalelei atoa o le maota gasegase o Tuasivi.
