O le vaiaso atoa na tea nei na faagasolo ai faataitaiga o galuega na amata mai i fonotaga ma aoaoga a afioaga o le Vaimauga i le talafatai o Apia e saili ai pe ua lava sauni tagata o lenei itu o le atunuu, i taimi e tulai mai ai faalavelave faalenatura e pei ona vaaia ai le toatele na matuā aafia i afa fulifao ae e lē gata i lea o lologa.
O le Faalapotopotoga a le Ekalesia Aso Fitu o le toe Afio Mai ua feagai ma tali o faalavelave faafuasei, le ADRA lea e faatautaia nei tali mai i afioaga i taimi o afa fulifao atoa ai ma lologa.
O afioga nei o le talafatai o Apia e pei o Matautu, Vaiala, Magiagi ma Tanugamanono na faagasolo a latou faataitaiga.
O aoaoga na faatautaia i masina ua mavae na aofia ai le vaevae lelei o komiti eseese, o i latou e faatinoa le galuega laveai ma le fesoasoani muamua. E le gata i lea o i latou e feagai ma le aveese o tagata mai i nofoaga e aafia ai o latou soifua ma ave agai i nofoaga saogalemu.
O i latou e feagai ma le faaleleia o nofoaga e faamautu ma sulufai i ai le atunuu ae lē gata i lea o i latou e feagai ma le faasoaina o fesoasoani i aso uma i le mae‘a ai o le tulai mai o nei ituaiga faalavelave matautia.
O le faamatalaga a le alii na taitaia le faasavali lenei a le ADRA i afioaga, ua telē le suiga o le tali atu a le atunuu auā o taumafaiga muamua na vaaia ai e foliga mai e lē faamamafa e le atunuu faataitaiga petai na amata mai lava i le faataitaiga i Matautu le vaaia o le malosi o le tali mai ma le maopoopo o ana komiti ua tofia mo tiute i taimi e tulai mai ai faalavelave tetele nei. O le auga lava ia faasao soifua ma ia faaitiitia meatotino e faaleagaina pe a afatia Samoa i nei faalavelave faalenatura.
O faataitaiga na amata mai lava i le sami ma o Vaiala ma Matautu ia e tulata i le sami na faamalosia le agai i le gataifale e amata mai ai galuega laveai. Faaalia e le sui o le ADRA ia Tuioti le lelei tele o le tali mai a le afioaga o Matautu i le vave o le gaioi a tagata uma i le faatinoga o galuega laveai aemaise o le aveese o le nuu mo nofoaga maualuluga. Ta‘ua e Tuioti o le faailo lea o le faamamafa ua ave e lenei afioaga i le tali atu i nei faalavelave pe a toe tulai mai.
O Tanugamanono ma Magiagi na faatautaia a la faataitaiga i auvai o le vaitafe o le Vaisigano o se tasi o nofoaga na iloga le afaina i le afā o Eveni i le tolu tausaga talu ai.
O le faigata lava o galuega laveai i Magiagi ona o le vanu lea na matuā aafia ma o le taumafaiga ina ia vave ona agai ane i luga o le vanu i le nuu tele i le taimi o lologa auā o le afā o Eveni e lei iai se fale i le vanu e lei lilo atoa i tafega o le vaitafe.
