O se polokalame na faavae e lē sa Peresetene o Amerika i tausaga ua tuanai, o Bill Clinton ma lona aiga, e faatalatalanoaina ai atinae ua vaaia le aogā i le lalolagi na o latou faalauiloa galuega a le Faalapotopotoga o Tamaitai Fai Pisinisi o Samoa (Women in Business) i lana fonotaga o le masina na tea nei.
O lea fonotaga e valaaulia ai taitai o malo eseese, o i latou nei e aofia ai Ao o Malo eseese, o i latou ua manumalo i le faailoga maualuga taualoa e ta‘ua o le Nobel Prize – Faatumutumuga o faailoga taualoa i le lalolagi ma faauluuluga o kamupani tetele o le lalolagi aemaise Amerika.
O le latou galuega o le faatalatalanoa o atinae nei e pei ona laga ai le Faalapotopotoga lenei i Samoa ma ana taumafaiga i le atinae o tamaitai atoa ai aiga i totonu o Samoa aemaise o auala ua mafai ai ona faatau atu oloa gaosi i Samoa i atunuu mamao. E le gata i lea o le soalaupule o ni faafitauli o loo vaaia le faatuputupulaia i le lalolagi.
Faaalia e le Faatonu o Tamaitai Faipisinisi i Samoa, o se faaeaea maualuga lea ua faamauina ina ua ta‘ua le talanoaina o le WIB i lea fono tele aemaise o le vaavaai o ia taitai i le tāua o le auaunaga ua faatino e le WIB mo le atinae o soifua o tagata i Samoa nei.
O le taulai o le fono e pei ona talanoaina ai lenei faalapotopotoga i Amerika – o le galuega ua faia e nisi o atunuu o le lalolagi e unai ai le atinae o tamaitai.
O le tamaitai faatonu o le WIB o se tamaitai muamua lea o le Pasefika na taulimaina se tasi o faailoga taualoa e 10 mai i le faalapotopotoga e ta‘ua o le Faailoga o taitaiga i le Lalolagi i le atinae o tamaitai.
O le tamaitai Failautusi o Amerika (Secretary of State) o Hillary Clinton ma le tamaitai na umia lea tofiga i tausaga ua tuanai o Madeline Albright e ana le faalapotopotoga e tauaaoina ia faailoga taualoa i tausaga taitasi.
O le fono a taitai o le Pasefika i le Atu Kuki i le masina o Aukuso na feiloai ai Adimaimalaga Tafunai ma le taitai lea o Amerika o Hillary Clinton ma o se fesootaiga o lea ua vaaia ai nei le amanaia e lea malo tele aemaise o le faalapotopotoga lenei a Bill Clinton ma lona aiga o lenei atinae i Samoa.
