O se faaaloaloga aloaia a le Ekalesia Nasareta i Logan mo le faafeagaiga ma lona faletua
E lua ni mafuaaga tāua na faalauiloa i le sauniga faapitoa a le Ekalesia ‘Logan Community Church of the Nazarene’ i le Aso Sa na tea nei. E lē gata o le tatalaina faapitoa o le hall a le Ekalesia, ae sa latou amanaia ma tuuina atu se faaaloaloga aloaia, i le susuga i le faafeagaiga ma le faletua, Nick ma Bev Faataape.
Ua tusa ma le 15 tausaga talu ona la tauaveina le galuega faafaifeau, o le faafaileleina o agaga faaleagaga o le lafu mamoe i le Ekalesia Nasareta i Logan City.
O le tausaga 2012, sa malolo ai i laua ua litaea mai le galuega, ua lē toe tutusa le malosi ma maua foi i gasegase o le tino. Sa ta‘ua e le faletua ia Bev, sa faateia i laua, e lei mafaufauina o le a iai se faaaloaloga faapitoa a le ekalesia e amanaia ai i laua e pei ona faataunuuina, auā e lē masani ai.
O le susuga i le faafeagaiga Livisitone PoChing ma le faletua ia Fusi, sa auai i lea faamoemoe ma nisi o le latou Ekalesia Samoa i Kingston, le ‘Living Hope Community Church of the Nazarene’. O se tasi o lala faatu mai le ekalesia i Logan. Sa auai nisi o malo faapitoa, o taitai papalagi mai le ekalesia aoao, faapea foi ma le alii faipule o le sui o le pulenuu a le itumalo, le susuga Councillor Steve Swenson ma ia saunoa ai i lona agaga faagaeetia ona o le galuega tāua o loo faatinoina e le ekalesia mo le lelei o le itumalo.
E lei mae‘a le galuega o le fauina ma le toe faafouina o le hall a le ekalesia, auā o loo iai le faamoemoe e fau ai i totonu ni potu faapitoa mo le pueina o musika ma nisi o fuafuaga faatatau mo le tupulaga talavou, faapea foi mo tagata lautele o le pitonuu. Ma o nisi lava o sui o le ekalesia o loo iai le agavaa faakamuta, o loo latou faagaioiina le fauina o le hall.
Na saunoa le susuga Reverend Dr David McEwan, ua faaigoaina aloaia le hall a le ekalesia, i le ‘Nick & Bev’s Place’, e manatua ai pea le tautua a le auauna a le Atua ma le faletua. O David, o ia o loo tauaveina faaletumau le tiute faafaifeau mo le ekalesia i le taimi nei, ina ia gasolo lelei le suiga o le taitaiga mai le faifeau malolo, a o saili atu i se tasi e valaauina e le Atua e faaauauina le galuega i le taimi talafeagai a le Atua.
Sa maitauina le lotogatasi ma le galulue faatasi o sui o le aulotu, toatele i latou mai atunuu eseese, o ulugalii, autalavou ma le fanau, o aitema matagofie o siva ma pese tapena lelei, o le gaseseina o taumafa, sa vaaia le agaga fiafia o se aiga faaleagaga e fealofani ma fetausiai o loo tapenapena e le Atua mo le isi laasaga fou i le agai i luma o le ekalesia.
