O le vaiaso talu ai na maua mai ai se tala faanoanoa i le maliu o se alii Samoa talavou e sefuluiva tausaga mai Kuiniselani Matu i Ausetalia, le alo o le atunuu ia Francis Winterstein.
O le alii o Francis lea ua maliu o le uso laitiiti o le uigi matautia a le Toa Samoa ia Antonio Winterstein.
O le maliu o si ona uso na mafua ai le faamamulu o le alii o Antonio a o tapena toe sauniga o si ona uso. E maliu Francis o loo ua sainia nei e le Brisbane Broncos ma ua atagia foi le ono manuia o ana taumafaiga i lenei lava taaloga o le lakapi liki ua mautu ai lona uso matua.
Ua atoa ai nei le toatolu o tama talavou i le taaloga o le lakapi liki ua maliliu i lenei tausaga faatoa ausia le masina o Mati. O le isi toalua na maliliu i le masina o Ianuari e aofia ai Ai Ryan Grieveand o le kalapu a le Cowboys faapea Hayden Butler o le Storms. O loo faagasolo nei sailiiliga a leoleo i le maliu faafuasei o lenei atalii.
O le tausaga e 2013 na maliu faafuasei ai foi se sui o le Toa Samoa ia Alex Elisala (Cowboys) i le uma o le taaloga ma Toga i Penrith ma na talanoaina ai le faatāua o le leo o mafatiaga o alo ma fanau Samoa, Toga, Fiti, Maori, Apoliti o loo taaalo i le NRL aemaise tama taaalo lautele.
O lea tausaga na toe maliu ai foi ma se alii Toga talavou ia Moses Fotuaika (Tigers) na maua atu e lana uo ua pule i lona ola. O se faamatalaga na faailoa e leoleo o se manu‘aga mai toleniga na atugalu ai lava Moses Fotuaika ma na oo ai lava ina uma ai lona ola.
