O le aso ananafi, Aso Gafua 16 Mati 2015, o le a faamauina i le talafaasolopito o le afioaga o Fuailoloo i Mulifanua ua mafai nei ona fua le fanua o loo tu ai le malumalu o le Ekalesia Faapotopotoga Kerisiano i Samoa e aunoa ma se vevesi.
O lea ua mae‘a ona fua le fanua ua valu tausaga o taumafai e faatino i le va o le aiga o sa Tupuivao ma sui o le aulotu lenei ma o le taumafai atu lava ae agai ane sui o le aulotu ma taofi le fua fanua. Na iu lava foi ina avatu leoleo ae na tulai mai lava feeseeseaiga ma saga tolopo ai lava lea faamoemoe.
O se vaaiga ese la le aso ananafi ina ua maua se toafilemu ma e agai atu le vasega o malu o le malo ae ua atoa le itula talu ona amata le galuega o loo maimoaina lava e le afioaga ma le aulotu lenei atoa ai le aiga sa Tupuivao lea na talosagaina le fua o le fanua.
O le tausaga e 2006 na saili ai le pule o le fanua e ta‘ua o Fogalefue i Fuailoloo lea na ta‘ua e le aiga sa Tupuivao o i latou e ana. Ua sau le faaiuga i le tausaga lea e faamaonia ai ma o le tausaga e 2008 lea na faapea ona fai mai ai le faatonuga a le faamasinoga na talia ai le talosaga a le aiga e fua le fanua.
O le feeseeseaiga la i le nofoaga tonu e ta‘ua o Fogalefue lea ua faapea ona tulai mai ai le umi ona tau fua lenei fanua seia oo mai i le aso ananafi lea ua mafai ai loa ona faatino.
O le sui o le aiga, o sa Tupuivao, le Afioga Taimalelagi Na‘otala na faapea ona iai ma sui o le aiga e molimauina lenei galuega ma na ia faafetaia le Ofisa o Faamasinoga, le matagaluega o Leoleo atoa ai foi sui o le Ekalesia i le lava o le onosai e faatautaia ai lenei galuega, ma na ia ta‘ua o le tulaga tāua lava i lona aiga o le tuu pepa o nei faaiuga auā le agai i luma ae e lē o iai se manatu o le a aveese fua le lotu ma le maota o le faafeagaiga ona o le galuega lea na mamulu ai le fanua o lona aiga i tausaga ua mavae.
O le faamaninoga o le eka atoa lea o le fanua ona ua iai nisi ua fausia maota i autafa o le galuega lenei e lē o talafeagai ona o le galuega a le Atua le auga o le foai ma o le mafuaaga lava lea o le finauga na faia.
O le mau a aiga tuaoi, ua sopo atu le fanua lea e ta‘ua o Fogalefue i fanua lava ia e ese o aiga nei i Fuailoloo ma o le taumafaiga la lea o le aso ananafi ina ia faamanino le eka lea ma vaavaai pe fia maota o loo fausia ai e ese mai i le malumalu ma isi maota o le galuega a le EFKS i lea pitonuu o Mulifanua.
Faaalia le agaga faafetai o le aiga sa Tupuivao i le Ofisa o Faamasinoga o Fanua ma Suafa i le masuigamalie ai o lenei mataupu aemaise o le Matagaluega o Leoleo na luga lalo foi finauga i taimi ua tuanai ona o le tuua‘ia e Taimalelagi i le lē mafai ona foia lenei faafitauli, ma o le faaiuga o le vaiaso na valaauina ai e leoleo i Faleolo itu e lua ma lapatai i ai o le taimi mulimuli lenei o le a faia ai lenei galuega o le fuaina o le fanua ma o le a mautinoa o le a tulai malosi leoleo e faamalosia le tulafono pe afai lava e lē iai se filemu e tulai mai.
Ma o le aso la ananafi e na o le toafā lava leoleo sa iai i lenei fuagafanua ina ua ioe itu uma o le a faamalosia le filemu i le va o itu e lua.
E manino le maaleale o nei mataupu ae o le faafetai a i latou uma sa iai ua ulufia le agaga o le filemu i itu uma ma mafai ai loa ona fua Fogalefue i le mae‘a ai o le tele o tausaga o taumafai e faatino lea galuega.
