Se mea ina a faigata o le tetea faafuasei ma mafutaga motusia, leai se faatofa mulimuli, leai se lagona o se toe taimi lea e vaai ai i le aiga aemaise le fanau pele.
Na ala usu pea i feau ma tiute masani o le aso 22 Fepuari 2011, le aoauli o le Aso Lua i le 12.51pm na malaga mai ai i le pasi i le taulaga, ae fetaui ma le lulu o le mafuie i Kalaiesetete ma maliu ai lava.
O le alii o Jeff Pelesa Sanft, e 32 tausaga mai le afioaga o Alamagoto i Samoa.
E toalua nai ona alo teine laiti, o Hazel ma Olive. O ona tuaa o Jeff ma Christine Sanft, faapea le tina o si ana fanau o Tuai Asi Seiuli- Lafi, lea ua tuua nei le mafutaga vavalalata.
O lenei atalii e tupuga mai i se aiga talenia i musika, e pei ona iai le alii pese lauiloa o Scribe sa faatasia ai i ona toe sauniga.
O le afiafi o le Aso Lulu sa faia ai lona sauniga faaleaiga i le Kerrs Road Chapel. Na matagofie le tumu o lea afiafi i aiga na tagi mai ala, aemaise uo ma ē masani.
Ae o le taeao o le Aso Tofi, 3 Mati, sa leai se ofi o le malumalu i le mamalu o le atunuu na auai, aemaise uso palagi ma Maori ma atumotu eseese, o le toatele sa faalogologo atu i fafo ma loimata lē mātū.
O se sauniga faamomoiloto talu ai o le tamafanau Samoa ua aveesea talu lenei faalavelave faanatura.
Na taitaia le sauniga e Rev George Ehau ma sa faaaogāina le gagana Peretania ma le gagana Samoa i nisi o molimau faapea viiga o le Atua.
Na matauina le foliga mai o lenei sauniga faapitoa o se maliu o se alii Palemia i le matuai faatumulia.
I se molimau mai ona mātua peleina, na ta‘ua ai o se atalii amio tausaafia ma le loto alofa.
Na molimauina foi e le tusitala na faaalia foi lona soosoo tau‘au i lana foai agalelei mo le sunami i Samoa i taimi o sailigatupe a Kalaiesetete i luga o leitiofoni.
Ae na faaalia e Tuai ona faiva alofilima faatamā alofa mo lana fanau pele, o ana penina ia ua tuua.
Sa faatasi ai foi i lea sauniga mamalu le afioga i le alii faipule mai Mangere, le Susuga Su‘a Williams Sio (Labour) ma maua ai se avanoa e sui o le Samoa Times ma le Televise Samoa e faatalanoa mo sana saunoaga i mafatiaga ua oo i ai si o tatou atunuu i Kalaiesetete.
Na mae‘a le toe sauniga ona molimoli atu lea o lona sā mo lona oliolisaga tumau, faatasi ai ma moomooga alofa ina ia manuia le malaga a Jeff ma le feiloai atu i lona matai.
Avea foi lenei avanoa e auala atu ai faamaisega a le pulega ma le aufaigaluega a le Samoa Times ina ia faapea ona iai faamafanafanaga a le Atua i mātua peleina o Jeff ma Christine, uso ma tuafafine, aemaise Tuai ma le fanau pele, Hazel & Olive ma le mamalu o le aiga faanoanoa.
