O loo nofo pogisa le toatele poo fea ua fai i ai suesuega faalotoifale a le ofisa o leoleo faasaga i ni mataupu se tolu o loo tuuaia ai nisi o Malu o le Malo e aofia ai se leoleo sinia o loo tuuaia na maitaga ai se tamaitai pagota.
Ua savalia nei le tolu vaiaso talu ona tulai mai tuuaiga i se taulealea pagota na faaoolima i ai se leoleo o le falepuipui i Tafaigata, ae ese ai tuua‘iga faasaga i ni leoleo sa faaoolima i le tina o Faasalafa Sione sa nofo taofia i le pou a leoleo i Lalomanu Aleipata.
“Ua ou lē iloa i le vaega o le Professional Unit na ave i ai suesuega poo ua mae‘a ae e tatau ona maua se faaiuga i le vaiaso nei”.
O le finagalo lea o le sui sooupu o le matagaluega o leoleo ma falepuipui, le afioga i le Komesina Lagolago, Leaupepe Fatu Pula, i se talanoaga i le telefoni i le Aso Faraile nei, 4 o Fepuari 2011.
“O le suesuega i le leoleo sinia o loo feagai foi ma le professional standards unit, ma ou te lē iloa poo fea ua oo i ai le latou galuega se‘i vaganā le alii komesina e tatau ona iai sona silafia”, na saunoa mai ai le afioga Leaupepe.
“Na ou faalogo o faatonu e le Komesina le vaega suesue i mataupu e aafia ai leoleo, e tope mai le suesuega ma na pau lena o lo‘u iloa i tuuaiga o leoleo faasaga i le mataupu ia Faasalafa”.
E lei maua se avanoa i le alii komesina, afioga Lilomaiava Fou Taioalo, ae ua faaleo mai i le tusitala ni atugaluga o nisi e vavalalata o latou sootaga i nei mataupu o loo tagofia i suesuega faalotoifale a leoleo, ona ua umi tele o faatali.
“Ou ke ofo lava pe afai e lei uma gei suesuega, ma ou ke fai aku aga o se isi kagaka ga faia ia faaoogalima ae lē o leoleo ua leva oga fai gi moliaga”.
O le alii leoleo sinia o loo tuuaia i le maitaga o le tamaitai pagota o loo faigaluega lava e oo i isi leoleo o loo tuuaia i faaoolima. Faaalia e le sui sooupu o le matagaluega, o le tausaga e 2013 e mae‘a ai le konekarate a lea leoleo sinia.
O le tele o mataupu ua tuuaia ai le auaunaga a leoleo, lē o ‘alo ai le komesina ma le pulega i le faia o faaiuga talafegai pe a mae‘a mai suesuega ae e iai molimau e lagolago ai ni moliaga faasolitulafono faasaga i ē o loo tuuaia.
O le toe faamanatu foi lea a le afioga Leaupepe Fatu Pula ia i latou o loo tuu fesilisili poo afea e mae‘a ai suesuega i le pagota na fasi i Tafaigata, le tina o Faasalafa na aafia i ni manu‘a tuga ona o se faaoolima foi a nisi o leoleo, ma le aafia o se leoleo sinia ona o se tamaitai pagota na maitaga lea na faapau lona ma‘ito ma mafua ai ona molia se isi tamaitai sa tuli sona faasalaga muamua i le falepuipui, ona o le solitulafono o le faia o se gaioiga e faapa‘ū ai se maitaga o tamaitai.
