O se saunoaga lea a le tiakono o Ioane Livi mai Faleaseela, i le feiloaiga i Panania i le Aso Lulu na tea nei.
O ia na malaga faatasi mai ma le Sui-Akiepikopo Ekalesia Katoliko, afioga ia Patele Penetito Mauga, ma le failautusi a le akiepikopo, le afioga ia Patele Spa Silva, i sa latou malaga taamilo i Purisipeni, Sini ma Aukilani.
Ua talafeagai lana saunoaga, ma le auga tonu o la latou malaga taamilo, fai semina, o loo tauave mai ai le feau tāua, “Ia Faatāuaina le Upu ma le Eukalisitia”. E tolu vaega o semina: (1) Sakalameta – Ioane Livi; (2) Eukalisitia – Patele Spa; (3) Upu – Patele Penetito.
O faanaunautaiga o le au malaga ia toe faafouina le malamalama o tagata o le Ekalesia i le UPU ma le EUKALISITIA.
E toatele i latou ua faatalalē ma lē amanaia nisi nei o measina o le faatuatuaga faa-Katoliko, ai o le ala lea o le liu lotu ona o le utiuti o le silafia i nei itu.
Ua taliga fia faalogo le mamalu o le atunuu i nei semina, ona sa matuā lava tapena auauna a le Atua o loo faafoeina, i soo se vaega. Ua taunuu ai upu o le pese, “O le poto e tāua i le olaga o le tagata,” auā ua matuā tamaoaiga tele ma agavaa i latou.
O le Aso Gafua ma le Aso Lua na talimalo ai le Matagaluega a Samoa i Sini, lea o loo faatautaia e afioga Patele Tietie Siatulau ma Patele Paulino Kolio. Ae o le toe aso i Ausetalia nei, na talisapaia ai e le Afioga Patele Maurice Thompson ma le auaiga o le Divine Mercy, ae lagolagosua i ai le aulotu i Panania, taitaiina e Mulipola Apelu Levi, ma si aulotu tauasa mamao mai New Castle, o loo taulamua mai ai si tamā Toga o Matapula Kolo.
O le Divine Mercy, e leai ni nofoa a laulau, ae na o tofiga ua faaigoa o failautusi, lea ua iai le faamuamua i le tamaitai agamalu o Akenese Alalaga.
O failautusi nei mai olo taitasi, o le Divine Mercy, Carol Su‘a – Laupama – New Castle, Galo Tuimatafanua – Panania, Nive Byron – Ruse, Tofilau Mealamu – Rooty Hill, Palepa Galuvao – Lakemba, Sa‘o Tuetu‘e – Bankstown. O mātua faufautua – Salā ma Nive Andrew, Laufili ma Pelenatete Tuaimau.
Tatou te sapi ia tatou tu ma agaifanua, e faapena foi le faananau atu o nei mafutaga, i le faataliga aloaia o le aumalaga e ala i le ava o feiloaiga na saunia ma faatinoina e le aulotu a Panania.
Na fita ma umi se taimi o felafolafoaiga poo le faatau, auā se tasi e lauga e faafeiloaia le malaga, talu ai ona e feololo lava nai failauga iloga o le atunuu na auai, e pei o le tofa ia Muliaumalu Piliae, Leulumoega.
E ui ina ua sinasina le tautua iloga a lea tamā i faiva o faleupolu, peitai na ave le faaaloalo, e tiu ai le tofā ia Fata Paulo mai Panania. O le tamaitai lalelei, toe nofo taupou, o Matalena Paulo, na filifilia e avea ma augafaapae.
O le afioga ia Tualasea Willie Betham na faasoasoaina ‘ava taumafa, ae o le alii talavou ma le onomea o Andrew Tuimatafanua, na ia tautuina.
Na mae‘a le ava o feiloaiga, sosoo atu ai ma le faanofoaliiina o le UPU poo le afioga a le Atua, to‘a faagasolo ai vaega e tolu o le semina. Osiina le taulaga paia o le Misasa i le itula e iva i le po, lea na taitaiina e le sui-Akiepikopo Patele Penetito. Na matuā faamalieina le malaga mamalu, i le felanulanuai o taumafa na saunia mo i latou, e pei o le lauusiusi o ni fugalaau manogi, e pei foi o le iila ma le lautetele o sei o i latou na gaseseina.
E lele le toloa ae maau i le vai, e ui ina ua leva ona aumau i nuu ese, ae lē mafaagaloina a tatou tu ma agaifanua. E pei ona masani ai i tatou, e lē gata i loimata o faanoanoaga, ae ia faatinoina lo tatou alofa, tusa lava pe e tau lē lava le faasoaina o le penesione a nisi mātua, ae o sina matāua se tasi pe lua mo auauna a le Atua, auā e lē aumaua ia faamanuiaga.
Faafetai foi i le tofa mamao, a le afioga Patele Epati (Puleaga Purisipeni) i le avanoa faaauro mo Sini nei, lea na outou faaavanoaina. O le aso a taeao, Aso Tofi o le a tuua ai laueleele o Sini mo Malaeola ma Nofoaga i Aukilani, ae toe taliu i fanua i le Aso Gafua.
Se malo le fai o le faiva, i lua afioga Patele ma Patele ma le afioga i le tiakono Ioane Livi, ua pei o le Ekalesia ma‘i i matou, o ni eleele na naumati ma galala i le fia aai. Ua malamalama atili o matou ala ona o la outou malaga faa-Evagelia, ona o le alofa i agaga ma mamoe a le Ekalesia Katoliko, ua tau faamaamulu ma o latou faatuatuaga.
Sa pei i matou o se eleele na naumati, ae faafetai ua toe tuluia i timuga ona o lo outou mataala. Faafetai i le Agaalofa, o le a faafouina ai o latou tagata.