O le Aso Faraile a’o lumanai le aso malolo o le Labour Day i lenei setete, na taunuu ai ma nofoia e le ekalesia S.D.A. Logan City le togalauapi o Noosha ona o polokalame faatulagaina a le autalavou sa fuafuaina. E lē gata o se faigamalologa, tafaoga ae sa faafouina ai foi se malosi fou, manatu fou ma ni lesona fou a nai tupulaga talavou aemaise nai tamā ma tina matutua ma le ekalesia.
Na taunuu i le aoauli o le Aso Faraile aso 3 o Me, ma faamautu loa i le nofoaga. E ui lava e lata i le 3 itula o faimalaga, peitai o se mitamitaga na tulimatai i ai tagata uma e tolauapi ai ma siitia ai le viiga i le Atua i lea foi nofoaga.
O le taeao o le Sapati na faatinoina ai polokalame e pei ona faatulagaina e le komiti o le autalavou, sa faatinoina e vaega e fa sa vaevaeina i ai le aulotu. O vaega sa faaigoaina ia Rarotonga, Tahiti, Hawaii ma Fiti. E ui lava la i le faaaogā o isi atumotu, peitai na saunoa lana auauna ia Pastor Samuelu Afamasaga, o le faatauina o le Alofa, fiafia i totonu o se aiga, galulue faatasi, leai se faaailogalanu, faaailoga tagata ae ia tasi tagata uma.
O pese na faaaogāina lava gagana a ia atumotu e usuina ai pese. Na alo i faafiafiaga, na faatinoina ai siva, faataupati ma hula, na mata’ina le felanulanuai ma le matagofie o teuga i lea afiafi. E puupuu polokalame uma ae o loo afifi ai le agaga moni o le faamausaliina o le alofa moni ma le fealofaniga.
O le autu o le camp, o le faamausaliina pea o le alofa i totonu o aiga, o le alofa lea na faamamafaina afai e lelei ma mautu aiga, e manuia foi le ekalesia. E tauave mai le alofa i se aiga o se tamai lagi e oo lava i totonu o le lotu. O se fuafuaga e oese mai ai le aulotu mai aiga se’i fai se malologa ma tafafao ae o le auga tonu, ia maua pea le fealofaniga i totonu o aiga faapea le aiga o le Atua. E lē o se tala fatu, ae afua mai mauga manuia o le nuu. E tutusa tagata uma i le auauna a le Atua, e lē sapaia le isi aiga ae faasavali le isi aiga, e tutusa tagata uma e pei ona tasi ia Keriso.
O mātua ma le aumatutua sa na o le lagolago pea ma auai, ae o faatinoga a le autalavou ma fanau na maofa ai le toatele i le faaaogāina o le gagana, lesona na toe faamanatu mai ai aga ma tu faaaloalo i totonu o aiga taitasi ina ia faatāuaina pea le alofa atu, “Alofa Moni”. O le alofa faasafua lea e tufa ma faasoa atu i tuaoi lea na tata’i ma fafau mai ai soifua o mātua i aso anamua, lea lava ua avea o se ula e soosoo pea i augatupulaga i ona po nei.
Na toe fafagu mai ai le olaga mativa i Samoa e ui lava ina papa’u le tanoa ma utiuti le faasoa, peitai e tatau lava ona faamuamua le taumafataga a le faifeau faapea se tamā poo se tinā matua, tusa pe lē tofusia le aiga, ae sa tumau pea lena alofa ma maua ai le fiafia moni. E ova i le 300 le aulotu, toatele nisi o aiga na lē pa’au atu i le camp ona o tuatuagia lē ma’alofia ma fuafuaga faaleaiga.
O le susuga ia Pr Samuelu ma le faletua ia Emma Afamasaga o loo tausia le ekalesia. O le ta’ita’i toeaina o le susuga ia Asuao Malaulau Luka ma le faletua ia MaranataTitimanu faapea le sui ta’ita’i Toeaina le susuga ia Faiumu Lavea Peni ma le faletua ia Mati Va’ili.
Laulau a le Autalavou, Ta’ita’i – Tuilaepa Sauita Magele; Sui ta’ita’i – Elsie Faatauu’u; Faufautua – Su’a Iese Mo’aga; Failautusi – Dyna Paletaoga faapea le Komiti – Georgina Paletaoga; To’ivao Puni; Chistabelle Puni; Elihon Taulapapa; Leiaifaga M. Matauaina; Juliette Seupule Siolo; Brad Feo; Denis Vili Tagaloa ma nisi.
Na ta’ape le faatasiga i le Aso Gafua ua faatumuina loto i le olioli ma le fiafia ona o nei avanoa ua mafuta ai ma malaga atu le ekalesia mo faigamalologa ma tafaoga.
