O le Aso Lulu, 1 Me 2019, sa faataunuuina ai le tufatufaina o faailoga maululuga o Sikolasipi I le Maota o le Palemene i Ueligitone. O i latou sa mauaina maka e aupito i maululuga mai suega sikolasipi o mataupu taitasi ma isi faailoga e sili atu sa faalauiloa i lenei sauniga. Sa lotolotoi ai ma se alo Samoa e toatasi i lenei tufaga faailoga. O le tamaitai lea o Lupe Lesatele mai le Kolisi o Tangaroa, ua ia maua le Top Scholar Award i le Gagana Samoa i le tausaga na tea nei, 2018.
O le tamaitai o Lupe na soifua a’e i Samoa ma sa lelei le faafaileleina e lona aiga i le aganuu ma le gagana Samoa. Na malaga mai i Niu Sila aua se sailiga manuia mo le lumanai e ala lea i a’oa’oga. Sa iai lava lona naunau pea ia taofi mau i lana aganuu ma lana gagana e pele i lona loto ia aua nei mamulu pe valetuulima. Aua o lona talitonuga o atunuu nei e malosi ai le faatāuaina o le gagana lona lua poo le faaperetania. Ina ua ulufale i aoaoga i Niu Sila, o loo taofiofi mau pea lona lagona e faaauau ana suesuega i le gagana Samoa, poo fea lava e malosi mai ai gagana a isi atunuu e mausali lava lona taofi i lana gagana aua o le measina a lona atunuu, o le meaalofa foai fua foi lea a le Atua mo Samoa.
O le tausaga na tea nei na filifili ai Lupe e ave le gagana Samoa i le vasega 13. I le taimi muamua sa lei mamafa tele i lona aiga lea tulaga peitai ane ina ua vaaia le siitia maualuga o ona maka i totonu o le aoga i le maua ai o Excellence mai suega, o iina na talitonu ai i le tāua o le ave o le gagana Samoa i totonu o aoga. O iuga o laugatogi a le Kolisi o Tangaroa i le tausaga na tea nei, sa maua ai e Lupe le tele o faailoga mai le gagana Samoa, ma o ia foi na lona lua pe runner up i le Dux. O le maua mai la o faaiuga o suega sikolasipi i le masina o Fepuari o le tausaga nei, na faailoa mai ai o Lupe Lesatele, ua sili aoao i tamaiti aoga uma i totonu o Niu Sila atoa i le Sikolasipi o le gagana Samoa. O ia foi lea ua Top Scholar ia Niu Sila atoa ma o se fiafiaga sili lea ua matua faamautuina ai talitonuga o matua i le tāua o le a’oa’oina pea e fanau o le tatou gagana Samoa.
O le manuia o taumafaiga a Lupe i mataupu na ia sueina faatasi ai ma le gagana Samoa, ua maua ai ma le avanoa e ulufale atu ai ai i le Iunivesite o Aukilani. O lona naunautaiga ia ave lana faaloia ma o loo ave nisi ana pepa o le law poo le tulafono faatasi ai ma isi ana mataupu i le taimi nei. Ua faatietie e Lupe Lesatele lona aiga i luga o le maa salafa, ma o se faaeaea foi lea mo ona matua, lona tama matua ma lona aiga atoa sa tu’i le mulipapaga ma taputapuai a’o ia alofaiva ai i ana suega mulimuli o le vasega 13. O le taimi muamua foi lenei ua siitia ai le igoa o le Kolisi o Tangaroa i se tulaga muamua i le mataupu lenei o le gagana Samoa i totonu o Niu Sila atoa ina ua faasaofai e Lupe lana Kolisi i le nofoa numela tasi ia Aotearoa atoa. I tausaga ua tuanai sa maua foi e nisi o aoga lea tulaga maualuga, peitai o lenei ua see atu iai le vaa o le Kolisi o Tangaroa ona o le lelei o le taumafaiga a Lupe Lesatele.
O le faletua ia Rasela Lafaele Uili o loo faiaoga nei i le Kolisi o Tangaroa ma o ia foi o loo ia a’oa’oina le Gagana Samoa totonu o le Kolisi. O lona fiafiaga ua iai, ua mafai e Lupe Lesatele ona faaeaina le latou aoga i se tulaga maualuga.
Na ta’ua e le tamaitai faiaoga, e tatau i o tatou matua ona aua nei manatu mama i la tatou gagana Samoa. Ia mautu pea le tatou gagana muamua i fanau ua soifua ane i lenei atunuu ma o le lelei o le gagana muamua o le a faigofie ai foi ona a’oa’o le gagana lona lua poo le faaperetania.
O i latou foi e sili atu ma le tasi le gagana latou te iloa, o le tamaoaiga foi lena o le mafaufau. Ua faigofie i fanau o aveina le gagana Samoa i le vasega 13 ona pasi le UE poo maka e ulufale ai i Iunivesite. A tele foi togi Excellence poo Merit e ausia mai suega o sueina, o le tele foi lea o togi e mafai ai ona latou avea ai nisi o mataupu i totonu o Iunivesite. O le fautuga, ia maualuga pea le faatāuaina o le tatou Gagana Samoa aua ua tu matila i le saofaiga o gagana i Niu Sila ma ua siitia ai foi tulaga o alo ma fanau a si o tatou atunuu.
