O le alii Kapeteni o le All Blacks ia Richie McChaw ma le alo o Samoa ia Malili Muliaina, na o le pau ia o tama taalo o le au a Niu Sila na talia e le Iuni Lakapi a la talosaga mo a la malologa i vaiaso muamua e tolu o le Taamilosaga o le Super 14 o loo faagasolo nei.
O le tolu lea o vaiaso, e lua ai manumalo a le au a McChaw le Crusaders, tasi le faiaina, ae suipi mai ai le Chiefs a Muliaina i taaloga e tolu i Aferika i Saute; o le faaiuga o le vaiaso na tea nei e fa i ai vaiaso o le Taamilosaga.
O se tala fiafia i nei au e lua le mae‘a ai o malologa a nei alii, ona ua see foi le vaa o le taamilosaga, ma e manaomia foi le tuli loa o ni points aua le siamupini, e fetaui lava foi le toe taliu mai o alii nei, ae taaalo loa foi ma la kalapu i o latou lava malae, ia pe home games, ia ma o laua uma foi o Kapeteni o a la au.
O Richie McChaw la lea e manuia lana uluai taaloga i lona toe foi mai, ona o lea na le fai mea ai le Blues i le po o le Aso Toonai i Kalaiesetete, ma toe faafiafiaina ai le tapuaiga, a o le alii la o Mills Muliaina lea ua pau i ai le faaletonu i lana toe taliu mai, ina ua matua le pupula i faiga a le Queensland Red i le po o le Aso Faraile.
O le au lenei a Ausetalia e faaleano lava i ai ae matautia lana sau lea e maitau atu i ai i lenei tausaga, lea foi na faiaina ai le Crusaders i le vaiaso atu i tua i Ausetalia, aemaise o le latou kapeteni le alii mai Papua Niu Kini o Will Genia, lea na matua viia e le au maimoa lana faatautaiga o le taaloga.
O le isi vaega e matagā ai le faiaina a le Chiefs, ona o le omai lava o le Reds vali faalelei lava i luma o le fia selau o le latou au maimoa i le latou lava malae i Hemilitone, ma ua le faamaonia ai le upu e masani ai, “e le malo se moa folau i se moa fanua”.
Na manaia lava le amataga o le taaloga aua e mae‘a le ‘afa muamua ae ua tolu sikoa a le Chiefs mai ia Sivivatu, Masaga ma Taumalolo, peitai o le faaletonu o kiki a le alii o Donald i le pou na misi ai isi a latou ‘ai faaopoopo, ia ae e lei tuumamaina lava foi e le Reds le ‘afa lona lua, lea na latou maua ai le latou sikoa ma latou sala i le pou, ma iu ai lava ina manumalo i ‘ai e 23 i le 18 a le Chiefs.
Saunoa Muliaina o le tele o mea sese ma faaletonu laiti, faatasi ai ma le lelei o le puipuiga a le Reds le mafuaaga o le faiaina, ae o le a toe tilotilo i ai mo tapenaga o lenei vaiaso, ina ia toe maua so latou avanoa i le Final e pei o le tausaga talu ai, ia ae aua la o lea o le a taaalo ma le Crusaders i le Aso Faraile nei i Hemilitone, ma o le a toe feiloai ai McChaw ma Muliaina.
