Taufao e le Warriors ma New Castle Knight Sonny Bill Williams

Tailo foi i le tuliga a le isumu ma le pusi, pe maua le tuliga lea e fai nei i le va o le alo o Samoa ia Sonny Bill Williams ma le taaloga lenei o le lakapi, e le gata i le Iuni, ae faapea foi le Liki mo lona lumanai i lea foi faagatama.
E le toe tau faailoa le tulaga maualuga o lenei alii i le taaloga Liki, lea sa faapei ai o Ia o se Tupu o le Taamilosaga NRL a Ausetalia, i le toatele latou te mulimulitai i lea taaloga, aemaise o sponsors ma le maketi o lea foi taamilosaga tele.
O le 2007 lea na tuua ai e Sonny lana Kalapu le Canterbury Bulldogs i le ogatotonu o le taamilosaga ae lei mae‘a lana Konekarate, ma sa vevela ai le tele o le mau tusitusiga a le au tusitala ma le au faasalalau, ma lagalagā ai foi ma le tele o finagalo le manuia lea lava foi na taua ai ma le taitai o si o tatou Malo i Samoa i lona sainiina o le tusifolau Samoa o le alii taalo lea na malaga ai i Farani.
O le faaiuga o le season lenei e mae‘a ai le konekarate a Sonny Bill ma lana kalapu a Toulone i Farani lea e galue faafaiaoga ai le susuga a Tana Umaga, ma e maualuga le talitonuga o loo toe manaomia e Toulon le tautua a Sonny i le Kalapu, peitai na faalauiloa mai i le masina talu ai le mananao o le kalapu a Countie Manukau e latou te sainiina Umaga e fai ma latou faiaoga o le Taamilosaga o le NPC i Niu Sila nei, lea foi la ua faailoa mai ai ma le mulimuli mai o le alii o Sonny Bill ia Umaga, ina ia taalo ai i le kalapu lava lenei a Counties Manukau.
Ua vavala mai ai nei le moni o nisi o tala salatua ua leva ona faalele solo e faapea, e manao lenei alo o Samoa ina ia taalo mo le All Blacks i le Ipu o le Lalolagi, lea e talimalo ai Niu Sila i le tausaga fou.

E tatau ona taalo Sonny i se kalapu i Niu Sila nei i le taamilosaga o le NPC, ona agavaa ai lea mo le filifiliga o le All Blacks i lana tour taamilo mulimuli o le tausaga e pei ona masani ai i Europa, ona faatoa mautinoa lea o sona avanoa mo Niu Sila nei i le Ipu o le Lalolagi e pei ona avea ma ana moemitiga lea na mafua ai lava ona liliu mai le Liki, le taaloga sa pei ai o se Tupu ia Ausetalia.

Ae ese mai la i nei feuiuiaiga uma, le isi foi lipoti mai Ausetalia i le vaiaso talu ai lea ua faailoa ai le mananao o le Kalapu Liki a New Castle Knight ia Sonny Bill mo le taamilosaga o le NRL i le tausaga nei.
O se tasi lenei o kalapu e malosi tele i le taamilosaga Liki lenei a Ausetalia, ma o loo faiaoga ai se tasi foi o faamatua o le taaloga o Andrew John, ae o le faaiuga foi o le vaiaso na tea nei na faalauiloa mai ai le naunau o le New Zealand Warriors ia latou mauaina Sonny mo le tausaga nei, pe a mae‘a lana konekarate ia Iuni i Farani.

I se lipoti mai Ausetalia o loo taua ai le telē o le avanoa e ono malo ai le Warriors i lenei alo o Samoa, ae tatau ona totogi se tupe ia Bulldogs ona na alu ese ae lei uma lana konekarate i le 2007.
Ae manatua foi e le laititi le itu tau seleni pe a talanoa i tulaga o tauofoga faapenei, e oo mai lava la ina ua tuufaatasia lenei lipoti, e lei mautinoa lelei lava poo le ā tonu le laasaga a lenei alii i lona lumanai i le taaloga.

Na pau le maitau a le tusitala, e foliga mai o loo fetosoai pea faapautolo a loi lenei alo talavou o le atunuu e nisi o loo tutu mai i tua, ae faapea foi ma le malosi tele o lenei mea o le tupe.

Ia ua moni ai le upu a le Tusi, “O le mea lava e i ai lau oa, o le mea foi lena o loo taatia ai lou loto”, ia ae tatou tulimataia pea lenei alo o le atunuu ma talosia ae taunuu ma le manuia lona faamoemoe.