Ono pine a Lauren Sale
Na soo Samoa ma le lalolagi atoa i tala ave o manumalo e lua a Lauren Sale i tuuga ‘aau a le Pacific Games.
E lua ana pine auro na manumalo ai, tasi le siliva ma le pine apa-memea, toe faaopoopo iai ma pine e lua mai tuuga aau molifu’a (relay) e lua a teine i le 200 mita ma le 100 mita relay ona maua ai lea o le atoaga e 6 pine a Lauren Sale i le Pacific Games 2019.
O se fuainumera aupito sili lea mo taaloga uma a Samoa i taaloga a le Pasefika.
O le pine auro amata a Lauren na maua i le 200m Backstroke, e fai lava si mamao o lona manumalo i le tuuga lea, na tu lua ai Angeline Tregoat o Tahiti ae tu tolu Maiana Flament o New Caledonia.
O le pine auro lona lua a Lauren na maua i le 200m Individual Medley na mua ai ia Matelita Buadromo o Fiti na tu lua ai May Toven o New Caledonia.
Na toe maua ma le pine apamemea e tasi a Lauren i le 100m Backstroke.
E lei mae’a ai iina ona tiute ‘aau, ae na laina faatasi ma tamaitai o le ‘au mo le fu’a o le 200m freestyle ma le 100m freestyle. I le tuuga o le 200m fu’a na tu lua ai le ‘au a Samoa, Lauren Sale, Jelani Wetzell, Andrea Schuster ma Kaiya Brown. A’o le 100m fu’a freestyle na tu tolu ai foi le ‘au a Samoa, Lauren Sale, Andrea Schuster, Jelani Wetzell ma Lushavel Strickland.
I le mae’a ai o le Pacific Games e toe foi ai Lauren i Idaho le Setete o loo a’oga ma sikolasipi ai i lana taaloga o le ‘aau.
Lauren Sale
Gold: 200m Medley; 200m Backstroke;
Silver: 100m Butterfly; Women’s Relay 200m Freestyle
Bronze: 100m Backstroke; Women’s Relay 100m Freestyle
