E matautia taumafaiga a Brandon Schuster mo Samoa i tuuga ‘aau a le Pasefika ua asoa ai e ia i pine e lima. E lua Pine Auro na manumalo ai Brandon, tasi le pine Siliva ma pine Apa-memea e lua.
O Pine Auro a Schuster, Lauren Sale ma Lushavel Stickland o uluai pine auro foi ia a Samoa ua maua i feausiga a le Pacific Games talu ona amata taaloga.
Ua laasia ai e Schuster le sitepu i luga atu mai pine e lua na faamanuiaina ai i taaloga o le 2015 i Port Morseby, o pine ia o le Siliva ma le Apa-memea. Ae o lea ua asoa ana auro i taaloga i Samoa o le 2019.
O le pine auro muamua a Brandon o le 200m Backstroke. E lē o se tauvaga na faigofie auā o Tahiti ma New Caledonia na tu lua ma le tolu. O atunuu maoa’e ia o tuuga ‘aau a le Pasefika ae o lea ua manumalo ai Samoa i faiga a Brandon Schuster.
O le pine auro lona lua o le 400m Medley, o le feausiga lea e fa ‘aau – 100m butterfly, 100m backstroke, 100m breaststroke ae faaiu i le 100m freestyle.
I le tuuga o le 200m medley i le tuufaatasiga lava lea e tasi ae tai 50m i le vaega na tu lua ai Schuster, ae mua le New Caledonia na tu lua ia Schuster i le 400m. I le tuuga lea na ausia ai e Schuster le matati’a o le Pacific Games i le 200m medley, ae ua umia nei e Emmanuel Limozin o New Caledonia le matati’a fou, auā o ia na mua ia Brandon. O lona uiga, na tata’e uma e Limozin ma Schuster le matati’a tuai o le tuuga 200m medley.
O le matautia lea o le tulaga ua oo iai le ‘aau a Schuster. O Pine apamemea a Schuster e lua na maua i le 400m freestyle ma le 200m breaststroke. Na ta’ua e le alii kapeteni a le ‘au ‘aau o le fa masina na toleni ai i Saina na matua fesoasoani malosi i lana taleni. E lē gata i lea o loo a’oga o ia i le Iunivesite i Kalifonia o loo tapena ai foi mo taaloga o le Olimipeka o le 2020.
Na auai Brandon i tuuga o le Rio Olympics, ae o lea ua tapena nei mo le Olimipeka i Tokyo. O le tuaa o Brandon Schuster o Toesulusulu Cedric Schuster na tulai mai i le tofi faipule o le itumalo Aana Alofi Nu-3. O lona tina o Suzie Schuster o le faiaoga foi lea o le ‘au ‘aau a Samoa.
Brandon Schuster
Pine Auro: 200m Backstroke; 400m Medley
Silver: 200m Medley
Bronze: 400m Freestyle; 200m Breaststroke
