E mautu lagona ma talitonuga, o le amanaia ma le faalauiloaina o tauiviga e ala i le faaeaina o alo ma fanau, ua alagātatau lea e manatua pea, a’o feagai ma a’oa’oga. O le a teu i o latou loto, e suamalie le atamai, e mafai foi ona faafeao le tamaitiiti e le poto.
O le fua lava e lūlū, e toe selesele foi ma le alaga fiafia. Ua na’o lagona o le fiafia ma le agaga faafetai na molimauina i le Aso Sa ua tuanai 23 o Iuni na aofaga potopoto ai le matagaluega S.I.S.D.A.C a Kuiniselani i le molimauina ma faaailoa atili siitiaga ua laasia e fanau. E lē o ni avega amo gofie, e ui e lē o le iuga ae tasi lea faamalosi’au e una’ia ai fanau mo isi laasaga e fia ausia.
Na a’e se finagalo i le susuga i le taitai autalavou faapea susuga i faafeagaiga ma le komiti e ao ona faailoa ia tulaga, lea na feagai ai le autalavou S.I.S.D.A.C ma le polokalame e faalauiloaina ai nisi o alo ma fanau ma a latou taumafaiga e ala i le poto salalau faaonapo nei. E lē itiiti ai lava le viiga o le Atua e ou mea uma lava ona ua na’o Ia e ana lea poto ma le atamai ua tuuina i alo ma fanau a le ekalesia, e lē gata o le soifuaga nei, ae faapea foi le faaaogāina o ia tomai e tala’iina atu ai le Malo o le Atua. O se uluai taimi lenei ua suia ai lagona o fanau i lenei sauniga faapitoa mo i latou, ma o le a avea o se ‘olo e tuu atoa i ai le loto ma le mafaufau ma ia naunau ia ausia e tatau ona a’eina auā se manuia o le tamaitiiti lava ia, o aiga foi, ekalesia ma atunuu. (Faataoto 2:10) A oo le poto i lou loto, ma ua mālie ia te oe le atamai.
O le polokalame na faataunuuina i le Aso Sa aso 23 o Iuni i le hall tutotonu a le Matagaluega S.I.S.D.A.C i Kuiniselani lea na potopoto ai aulotu uma a le matagaluega ae molimauina lenei aso taupoina. Na amataina i le sauniga lotu puupuu, ona saunoa lea o lana auauna taitai aoao mai Niu Sila, Pr Willie Papu, e faamalosi i alo ma fanau. Na auai mai foi le taitai matagaluega a Cairns, le susuga ia Pastor Togamau Tuia.
Na faia le tufagafaaailoga ma tufatufa nai meaalofa ma teutusi mo alo ma fanau, ma faagasolo le polokalame, ona alo lea i le taumafataga. Na auai le loaloa o le matagaluega, susuga i le Taitai ia Pastor Misa Luao Matai’a, faapea foi le susuga ia Pastor Lagolago ma le nofo-a-faafeagaiga, faletua ma aiga, ma nisi sa asia ma molimauina lea aso tāua. O polokalame uma o le aso na faatautaia lava ma faafoeina e le ofisa o le autalavou.
E matagofie sao o le aufaafiafia a le Iunivesete o Griffith sa faatino ni faafiafiaga o lea aso, faapea foi nisi o ausiva na solo lelei ai le ‘ata i le mālūlū o lea aoauli ma aitema na faatinoina (items).
E tusa ma le 43 tamaiti mai le kindergarten e aofia ai foi alo ma fanau ua faamanuiaina e ulufale i Iunivesete faapea ē ua maua Double Degrees, Bachelors in Communication and Criminology, ma Diplomas.
Ofisa o le Autalavou S.I.S.D.A.C Kuiniselani:
Taitai Autalavou – Fiapaipai Tonuga Tamalii Pauu
Sui Taitai – Kaye Euese
Taitai Failautusi – Tuivale Muta
Sui Failautusi – Solise Esekia
Faatamā Autalavou – Setiu Iakopo Togipau
Faifeau Autalavou – Pr Johnny Siofele & David Fanene
