O le agaga fiafia ma le loto faafetai o le susuga i le a’oa’o ia Taito Taloto Teleni ma le faletua ia Filoiauro aemaise o laua alo ona ua maua le avanoa e toe faaaogāina ai le soifua o le latou tama i le laugaina o le upu faauuina a le Atua i luga o le fata faitaulaga.
Ua tele tausaga o galue le a’oa’o i se tasi o lala o le ekalesia EFKAS i le itu i Sisifo o Aukilani, peitai o fuafuaga ma polokalame a le aiga mai le Atua na mafua ai ona faamavae mai ma le ekalesia ae see mai i Saute o Aukilani ma aumau ai ma le aiga, lea ua nonofo ai seia oo mai i le taimi nei ma fai le latou pisinisi ma le fanau. O le loto fia galue ma le ola fia auauna pea i le Atua na toe laga ai se lagona o le susuga i le a’oa’o ia Taito Taloto ma le faletua ia Filoiauro e toe fia faaaogāina pea lo laua valaauina mai le Atua e ala i le folafolaina o le afioga a le Atua i totonu o le fatafaitaulaga.
O le filifiliga e mai le Atua ma e tatau foi ona faaaogāina le soifua mo le Atua ma lona finagalo a’o maua ai le malosi mai le Alii.
O le ekalesia EFKAS i Wiri o loo galulue ai le susuga ia Taito Taloto ma lona aiga i lalo o le ta’ita’iga a le susuga i le faafeagaiga ia Rev Mafutaga Faaleaogā ma le faletua ia Laia o ia foi o le toeaiga o le Pulega ma le Matagaluega a Niu Sila. O le filifiliga a le susuga i le toeaina i le faaaogāina o tofi o le susuga i le alii a’oa’o i totonu o le ekalesia i Wiri ua o faatasi ma le loto malie ma le lagona fuatia ifo o le a’oa’o ma lona aiga e fia tautua pea i le Atua ma lona finagalo.
O le aso Sa ua mavae 23 o Iuni na toe tulai ai le susuga i le a’oa’o ia Taito Taloto Keleni i le malumalu o le ekalesia EFKAS Wiri i le ta’ita’iina o le sauniga lotu i lona taimi muamua i totonu o lea malumalu.
O se sauniga mamalu ma le matagofie ao galue le Agaga Paia o le Atua i le faaaogāina o lana auauna i le ta’ita’iina o le sauniga lotu faatasi ai ma le folafolaina o le upu faauuina a le Atua. O le faaaogāina o le soifua galue o le tagata i le Atua e faalagolago mea uma i le ta’ita’ina a le Agaga Paia.
Na mae’a le sauniga lotu ona sosoo lea ma le toanai a le ekalesia EFKAS i Wiri na tapenaina lea e le susuga i le a’oa’o ma lona faletua ia Filoiauro ma le nofoaalo i le faleaiga o le Happy Days, ma faaiu ai loa polokalame o le aso i faaaloaloga na saunia e le aiga alii.
O le fetalaiga ia Feetau Finau Niulesa sa tu tootoo i le taimi o faaaloaloga ae o le susuga ia Muaiava Muaiava sa fai ma sui o le ekalesia e tali faitau e momoli le agaga faafetai i le a’oa’o ma lona faletua faapea le aiga alii ona o le toanai ma faaaloaloga ua maualuga ma matagofie ai le faamoemoe.
