Ua mae’a i le vaiaso nei le lisi na sainia e le kamupani vaalele o le Samoa Airways ma le kamupani Italia o le Icelandair na faaaogā ai le vaalele 737-800 na amata ai lana tautua i le silia nei ma le 12 masina. O le taofia o le aumaia o le isi vaalele lapoa atu o le ituaiga o le Boeing 737 Max9 ona o faalavelave ua tutupu i vaalele Boeing 737 Max8, e lei maua se isi vaalele e faaauauina malaga a le kamupani vaalele a Samoa.
Peitai o lea ua faaalia e le minisita o le Samoa Airways le afioga Lautafi Fio Selafi Purcell, e leai se itu e popole ai lo tatou atunuu auā e faaauau lava malaga mai Samoa mo Niu Sila ma Ausetalia. I se finagalo o le minisita ua lipotia ai le silasila o le pulega o le kamupani vaalele e faaaogā mo se taimi lē tumau se vaalele o le kamupani vaalele a Ausetalia o le Quantas mo malaga agai i Brisbane ma Sydney, e faapea foi i malaga i le va o Samoa ma Niu Sila ae e lei mautu tapenaga i se vaalele o se kamupani e faia ia malaga.
O le aso muamua o le masina fou lenei o Aperila ua muta ai le toe faaaogāina o le vaalele 737-800 na amata ai le tautua a le Samoa Airways. O le silasila mamao a le Malo e lē toe solomuli i le faaauauina pea o le kamupani vaalele ona o le tele o le manaomia o se isi auaunaga faapea mo faigamalaga a le atunuu aemaise o malo tafafao mai fafo.
E pei ona silafia o le amataga o le masina lenei sa faatulaga e amata ai ona faaaogā le vaalele 737 Max9 e sili ona lapoa mo uta ma le toatele o pasese e malaga ai, peitai ua toe faia le faaiuga a le Malo e taofi le aumaia o lea vaalele ona ua lua faalavelave ua maliliu ai tagata i ni vaalele o le ituaiga Boeing 737 Max8. E ui o le vaalele na fuafua e aumai o le 737 Max9 peitai o le fausaga lava e tasi. O le faamuamua e le Malo o le saogalemu o soifua o tagata malaga le mafuaaga autu o le lē faataunuuina o le lisi mai o lea vaalele fou ua mae’a ona vali lona tino i lanu o le Samoa Airways.
O le faaiuga e taofi le vaa na faatulaga e sui ai le vaalele ua toe faafoi ua toatele le atunuu e lagolagoina aemaise o atunuu o le lalolagi sa faaaogāina vaalele boeing 737 Max8, ua taofia le toe faaaogā o lea ituaiga o vaalele mo ni malaga. O loo faatali pea le lalolagi i sailiiliga ma suesuega i le mafuaaga o le palasi o le vaalele faapea o le atunuu o Ethiopia na maliliu uma ai le pasese ma le auvaa e to’a 157.
Vaalele mai Meleisia mo malaga faaauau a le Samoa Airways
O lea ua faailoa e le pulega o le kamupani vaalele a Samoa ua lata ina mae’a fesootaiga ma se kamupani vaalele i le atunuu o Meleisia o le a lisi mai ai se vaalele 737-800 e faaauauina le tautua a le Samoa Airways. O se vaa mai le kamupani o le Malindo Air ma e 150 pasese i le vaegaa o le Economy ae 12 pasese i le Business Class.
O taumafaiga ia i le sailia o se isi vaalele e faaauauina le tautua a le kamupani vaalele a le atunuu, ina ua mae’a le taimi na lisi mai ai le vaalele 737-800 mai le kamupani vaalele o le atunuu o Italia.
Ae i se toe faatalanoaga a le Pule o le Samoa Airways i Aukilani, le susuga Ma’ilo Tautiaga Senara ma le sui o le Radio Samoa i le taeao ananafi (Aso Gafua), sa toe faamanino mai ai e Tautiaga le fuafuaga a le kamupani vaalele ua iai nei mo le faaauauina o malaga a le vaalele i le va o Samoa ma Aukilani lea ua lē faataunuuina e le vaalele a le Samoa Airways. Mo malaga o le Aso Lua ma le Aso Tofi lea ua aafia i le va o Apia i Aukilani ma Aukilani i Apia, ua faatulaga nei e le Samoa Airways le kamupani vaalele a le Air New Zealand e faimalaga ai pasese ia ua afaina o latou avanoa ina ua leai se vaalele a le Samoa Airways.
