Ua filifilia le ‘au a le Samoa 7s mo taamilosaga i Hong Kong ma Singapore. O taamilosaga sosoo ia a le World Sevens. E amata Hong Kong i le Aso Faraile i le Aso Sa i le faaiuga o le vaiaso, ona sosoo ai lea ma Singapore i le vaiaso i luma atu.
O le ‘au ua filifilia ua faailoga i le toe foi o Tomasi Alosio i le ‘au. O Alosio sa feagai ma manu’aga, ae o lea ua toe foi i le manuia ma toe ofi atu ai i totonu o le ‘au.
O isi ua filifilia e iai Laaloi Leilua ua toe foi i le ‘au, faatasi ai ma le alii fou o Paul Scanlan. E na’o ia o le tagata fou ua faaopoopo i le ‘au malaga a le Samoa 7’s.
E sui Paul Scanlan ia Mauga I’amanu, Gasologa Pelenato ma Danny Tusitala. O le foi atu foi o Leilua e misi ai e nisi o le vaega ia le avanoa mo Hong Kong ma Singapore.
O le isi ua mamulu lona avanoa i le ‘au o le alii o Kirisimasi Savaiinaea, sa auai i taamilosaga i Niu Sila ma Sini, Ausetalia. E lei filifilia Savaiinaea mo taamilosaga i Amerika mae ua faapea ona toe misia i le ‘au ua faaigoa e le faiaoga Sir Gordon Tietjens mo taamilosaga o le a sosoo ai.
Ae o le tama tāua a le ‘au ua le ‘auai i Hong Kong ma Singapore o Joe Perez ma Alatasi Tupou ona o manu’aga.
O le a misia le toalua ia. Ae maise ai Tupou o ia o le tagata maua ‘ai maualuga a le ‘ai, e na’o Alamanda Motuga e sili atu ai ana ‘ai maua mo le 2018/19 ia Tupou. Faapea foi ma Perez. O le a misia le agavaa a Perez e su’e le laina tatao, o faaletonu mulimuli ia na feagai ma le ‘au i Canada ina ua faaletonu le taumafai a Perez ma isi tama.
O le toe foi ai o Alosio i le ‘au e atili tului ai malosi’aga o le ‘au e faavae i le le toafa o David Afamasaga, Alamanda Motuga, Tofatu Solia ma Tofatu Solia.
Faatasi ai ma le lelei o Siaosi Asofolau, Melani Matavao ma Murphy Paulo. O latou uma ia ua tapena malaga atu i Asia.
O taamilosaga o le 2018/19 e 35 taaloga na feagai ma Samoa. O le 57% o taaloga na manumalo ai. I lea fuainumera e 20 taaloga na manumalo ai ae 15 na faia’ina ai le Manu Samoa 7s. E 737 ‘ai a le ‘au na sikoa mai tatao e 115. Na’o le 81 o na tatao na ova aa.
O le toalua na solamua i manuia o le ‘au o Motuga ma Tupou. O le tele o ‘ai a le ‘au na maua i lima o tama ia. E 95 ‘ai na maua e Motuga ma Tupou e 94 ‘ai. Pau le mea e lei auai Alatasi Tupou i Las Vegas ma Vancouver, o lona uiga e sili mamao lona sao i le ‘ao i ‘ai pe ana taalo i taamilosaga ia e lua. Ae o Afamasaga lava e sili atu ai ana tatao e 19 mo le 2018/19. O le tele o ‘ai e maua e Tupou ona o ia e faamoemoeina e aaina tatao a le ‘au. O Tila Mealoi lea na feagai ma le tiute i Amerika ina ua le ‘auai Tupou. O isi e matua faamoemoeina mo le maua o ‘ai o David Afamasaga (80) ma Johnny Vaili (79).
O le taumafai a Samoa i Hong Kong ma Singapore ia tumau ai pea lona tulaga i le numera #7 o loo iai nei. O le faamoemoe e sosoo ai o le tuliloaina lea o le tulaga lona #6 o loo gafa ma Ausetalia i le taimi nei. E 65 ‘ai tuufaatasi a Ausetali mai taamilosaga ua mavae faatusa i le 59 a Samoa.
O le ‘au i luga atu o Ausetalia, o Egelani (80) ua fai si mamao e tuliloa i taamilosaga e fa o loo totoe – se’ia vagana ai e manumalo Samoa i se lua o ia taamilosaga ae see i lalo Egelani.
O le tagata fou o le ‘au e pei ona ta’ua i luga o le alii o Paul Scanlan. E taalo o ia i le Aana Chiefs i le Super IX.
‘Au atoa
David Afamasaga
Alamanda Motuga
Tofatuimoana Solia
Siaosi Asofolau
Tomasi Alosio
Melani Matavao
Murphy Paulo
Tila Mealoi
Johnny Samuelu
Elisapeta Alofipo
Johnny Vaili
Laaloi Leilua
Paul Scanlan
Taaloga a le Samoa 7’s
Samoa vs Scotland, 10:42 pm, Aso Faraile 5 Aperila
Samoa vs Japan, 4:16 pm, Aso Toonai 6 Aperila
Samoa vs South Africa, 8:22 pm, Aso Toonai 6 Aperila
