O le vaiaso nei lea faatoa tali ai le Ofisa Sili o le Matagaluega o Faatoaga ma Faigafaiva, le afioga Tilafono David Hunter, i le faaseā mai le peresitene o le Asosi o faifaatoaga fa’i i le atunuu, e tusa ai o le mau fesili oloo fia malamalama ai le Asosi  i le mafuaaga ua ala ai ona taofia le toe auina atu o uta fa’i a le Asosi i maketi i Niu Sila.

O le saunoaga a Tilafono, o le fia faamalamalama atili lea i le Asosi aemaise le mamalu o le atunuu, le aano  tonu o le faia e le minisita o Faatoaga o le faaiuga ua faia faasaga lea i le taofia o le auina atu o le fa’i i faitotoa masani i Niu Sila.

“O le taofiga lea e faapea na taofia ai le fa’i, ou te faamalulu atu, e lē faapea o se taofiga tumau, leai e lē o se taofiga tumau, o le puipuiga lava o le maketi ma o loo silafia lelei lava e sui o le Asosi o le au Faifaatoaga le itu lea ma e lē faapea, faatoa fai galuega, leai o lea ua galulue ma le peresitene o le Asosi ma le minisita ma ua faia ai le faaiuga ina ia galulue faatasi e toe vaai uma itu ia ma mafuaaga e saga faaleleia ai le auina atu i fafo o uta fa’i.”

Saunoa le Ofisa Sili, o le manumanuga o loo i le minisita aemaise le matagaluega, ina ia lelei atoatoa fa’i e auina atu i fafo, ma ia aua ne’i iai lava sina faaletonu, ona o lea faatoa toe matala mai le maketi mo le aufaifaatoaga fa’i i le atunuu mo Niu SIla.

“O le matou galuega tuufaatasi lea ua iai i le taimi nei, ia kilia uma issues ia na tau faaletonu mai, e lelei lava le toe auina atu o pusa fa’i a le aufaifaatoaga mai Samoa nei, ae ua lelei atoatoa e leai se faaletonu.”

“O le itu lena e ao ai ona malamalama lelei le mamalu o le atunuu i le mataupu lenei, ae lē faapea ua faasā tumau le toe auina atu o le fa’i mai i Samoa nei, aemaise lava mai i le aufaifaatoaga fa’i a le atunuu.

O le vaiaso na tea nei na faalauiloa faalauaitele ai e le Peresitene o le Asosi o Faifaatoaga fa’i i le atunuu, Tuisugaletaua Aveau Sofara, e lei faapea na taofia mai e Niu Sila le auina atu o uta fa’i. O le faaiuga o le taofia o le toe auina atu o le fa’i na fai lava e le minisita o le Matagaluega o Faatoaga, le afioga Lopaoo Natanielu Mu’a.

Saunoa foi Tuisuga, o le latou fesootaiga ma le kamupani o loo faamautu i ai a latou fesootaiga o le auina atu o le fa’i, ina ia toe tagai ane, ona e taunuu atu le pusa fa’i mulimuli lea na auina atu, ua iai fa’i ua pula, ma e mafua mai lea, i faifaatoaga fa’i, e silafia lava ua ova le matua o fa’i ae fafao lava i le container. 

Na’o le pau lea o le faafitauli e pei ona saunoa ai le peresitene. O le talitonuga o Tuisugaletaua e lē o se faafitauli tuga lea mataupu, ma ua mae’a ona fai agai i ai a latou fuafuaga, e pei o le toe fai o a’oa’oga faapitoa mo sui o le Asosi ina ia toe silasila lelei i le vaitau tonu e tatau ai ona fafao fa’i ina ia taunuu atu i Niu Sila o loo lelei atoatoa.

O le silasila a le matagaluega e pei ona faalauiloa e le Ofisa Sili e lē o se itu e ao ona manatu māmā agai i ai sui o le Asosi, e ao lava ona silasila toto’a i faafitauli pe itiiti pe tele, o lea faatoa toe faataga le fa’i, e tatau lava la ona matuā silasila ina ia aua ne’i toe iai sina faletonu e faaono tulai mai.

Fai mai Tilafono, “o le mataupu lea e lē o se mataupu tau faama’i, na pasi uma lava tuutuuga e pei ona usitaia e le Asosi o faifaatoaga fa’i i aiaiga ma tulafono o le auina atu o le fa’i, ae o le itu o le quality o le product o le fa’i, lea na ala ai ona aumai le faaaliga e le vaega tau i le auina atu o fa’i i fafo, ae o le faaasu, atoa ai ma isi vaega e latou te asia fa’i, na lelei uma.”

O le taimi la lenei, saunoa Tilafono, ua toe feiloai ma fetuunai le matagaluega ma le Asosi, ina ia toe tagataga’i atili i faafitauli nei mo le lelei atoatoa o le auina atu o le fa’i i Niu Sila.