O le Faatonu Sili o le Matagaluega o le Soifua Maloloina susuga Leausa Dr Take Naseri, ma le Faauluuluga o le ofisa o le soifua ,aloloina o le lalolagi mo atunuu o le Pasefika, le alii fomai o Dr Takeishi Kasai e faamautu i Filipina

O le Aso Gafua o le vaiaso o lumanai nei o le a toe foi ai le faiga o le tuipuipui o le MMR i tulaga masani a’o lei taofia ona o le faalavelave na fano ai ola o ni pepe se toalua. 

O le asiasi mai i Samoa o le Faatonu sili fou o le soifua maloloina o le lalolagi mo atunuu asia ma le Pasefika o Dr Takesi Kasai na ia asiasi ai i nisi o nuu ma afioaga o loo faagasolo ai polokalame a le matagaluega o le soifua maloloina, i lona fia silasila ma molimau i le tulaga o loo faatini ai nisi o auaunaga faale soifua maloloina i totonu o komiti a tina ma tamaitai. 

O le molimau a le Faatonu sili o le WHO mo atunuu asia ma le pasefika o loo maualuga le tulaga lelei o le faatinoina o le auaunaga tau soifua maloloina i Samoa. I le feiloaiga ma tusitala sa faaalia ai faanoanoaga o Dr Kasai i se taumafaiga a se tasi o tala’iga mai Ausetalia o le a oo mai i Samoa i le masina o Iuni, o le a tala’iina ai le tetee atu i le faia o tuipuipui.

O le molimau a le faatonu sili o ia e toatolu ona alo tamaitai ma o le pitolaau lea a soo se matua o le puipuia o le ola tuputupu a’e o le fanau ma o le tali faigofie o le faalogo ma usitai i polokalame a le soifua maloloina. 

Na faaalia e le faauluuluga o le soifua maloloina i Samoa le alii fomai susuga Leausa Dr Take Naseri o le aso 15 o le masina nei o Aperila e toe faaauau ai le tuipuipui o le MMR mo le puipuia o fanau mai faama’i o le misela, rupela ma le mami.  “Ua saunia nei pusaaisa e teu lelei ai le vailaau e faapena foi ona toe tapena le au faigaluega ia mulimuli i le siakiina uma o vaega a’o lei faia tui o fanau.” Na faaalia foi e Leausa o le suesuega na faia i le mafuaaga o le maliliu o pepe e toalua o loo iloa ai le saogalemu pea o le vailaau o le MMR ae o se gaioiga e mafua i le faatamala o le tagata e fesootai i le mafuaaga o lea faalavelave.

O le silasila mamao a le auaunaga a le soifua maloloina a le atunuu o le a amata ai i se taimi e lē o toe mamao le tuipuipui mo le itupa o tamaitai, e puipui ai mai le kanesa o le toalafanau poo le cervical cancer. 

Fai mai le faauluuluga o le soifua maloloina i Samoa e lei faia lava lea tuipuipui ae ua aau ona faaino.