E pei e tutui e se isi le fatu ma lagona o le tamaitai palagi, o Jo Mirkana, ina ua alia’e nisi o ata o seevae poo boots ua faaaogā muamua na ia aoina mo le faamoemoe e momoli faameaalofa mai mo le aufaifaatoaga Samoa, poo tagata foi o loo matuā manaomia seevae boots e see i le faatoaga.
O lagona o le maofa, lagona faate’ia, aemaise o le lagona faanoanoa na oo i ai Mirkana, ina ua faailoa i ai ata, o nisi boots na aumai i le container seevae e matuā masaesae, pala, toe ta’i tasi pea na aumai ai. O nisi foi o seevae boots o loo pipii ai palapala e lei aveesea, ae o nisi o seevae o loo piipii ai sima, pei e foliga mai na faaaogā e fai ai paluga sima ae lei mamā ona fufulu ese.
Na faatoa maua mai le tali a le tamaitai leoleo Ausetalia o Jo Mirkana i le imeli, ina ua fesiligia mo sana faamatalaga aloaia i foliga o nisi o seevae boots ia na aumai i totonu o le container, mo le faamoemoe mo tagata faifaatoaga Samoa.
Na fesiligia foi Mirkana i sona lagona, ona a silasila i nisi o ata o nei seevae, e foliga o lea ua faaaogā le avanoa lea e nisi o tagata Ausetalia na ao mai ai boots ua maua le vaega e tia’i mai i ai boots, ma ua foliga mai o Samoa o se atunuu e tia’i i ai oloa ua lē toe manaomia.
I le imeli a Jo Mirkana na ia faaalia ai lona faate’ia tele ina ua ia vaai i ata o boots. Auā foi, a vaaitino i boots nei, e fa’i o le masaesae, ae mautinoa lava o le taimi a e faamaulu ai, faatoa savali agai i le maumaga ae amata loa ona toulu mālie ese.
Fai mai Mirkana o pea seevae boots ia na ia taumafai e ao ma faaputu e lafo mai i Samoa, o seevae ua faaaogā muamua ae o loo atoatoa lona lelei, ma e mafai lava ona faaaogā, ona o loo lelei lava.
E 4,000 le aofai o boots, na ala ona manatu le tamaitai palagi lea e aumai i Samoa, ona e iai lana uo Samoa na talosaga atu ia te ia mo ni ona seevae e see ai i lana faatoaga. E ui la ina na’o le toatasi le tagata na fai atu ia te ia, mo sona pea seevae boots, ae na ia manatu atonu o le laolao lelei lea e na te aoina mai ai ma nisi seevae boots mo le aufaifaatoaga.
Na faitau masina sa faatino ai le galuega a lea tamaitai palagi e ao mai boots, mai i alii ma tamaitai leoleo o lana falefaigaluega i Ausetalia, fafao i atigi pusa, ma teu i totonu o le oloa container. Ae lē taulia ai le faatupega o le aumaiga i Samoa.
Fai mai le finauga a Mirkana, afai o foliga masaesae ma foliga malepelepe o boots ia na pue atu, e lē mafai ona saofia mai i le ofisa tiute o Ausetalia, auā e lē mafai ona ausia tulaga manaomia i le vaega o ofisa o le tiute a Ausetalia.
Fai mai Mirkana e matuā leai ma sona iloa pe faapefea ona sao mai seevae boots masaemasae toe malepelepe ia i totonu o Samoa. Ma afai foi la na iai ni seevae faapea, aisea na lē fesootai atu ai se tagata ia te ia, i le vaitau tonu lea na iai i Samoa, ae o lea ua atoa le fa masina talu ona tufa seevae boots, faatoa alia’e.
Peita’i o ia tuua’iga a le tamaitai leoleo, ua le ogatusa lea ma lana faamatalaga na faia i le tusitala, a’o lei toe foi i Ausetalia, ina ua fesiligia poo fea ua oo iai le tufaina o seevae.
Ae o lana tali, na fesootai atu le ofisa o faatoaga i Nuu ia te ia, e alu ane e faitau ana pusa seevae, ae o lana tala i le ofisa i Nuu e o latou e faitau, ua uma ona ia faitauina, ae o le latou galuega lena e fai, ua oo atu le pusa i o latou lima.
E lē talitonu Mirkana o ni seevae boots o le container lea na ia tuufaatasia lea ua alia’e, ma e iai lona masaloga, e iai se faiga faaalatua ua fai, ma e masalomia foi e lona tagata, pe faapefea ona alia’e boots ua matuā ova tele le tuai, ae leai ma ni seevae faapena na ia vaai i ai.
Na fesiligia Mirkana pe na iai tonu i le aso na teu pusa ai boots mo Samoa, na ia faaalia na iai, ae leai ma ni seevae faapea na ia vaai i ai. O seevae boots masaesae ia e talanoa atu ai, e lē na’o le tasi se seevae pe tasi se atigipusa. E lata i le sefulu atigipusa tutumu o boots leaga o loo faaputu i le tulimanu o le ofisa o le Matagaluega o Faatoaga i Nuu, ae ese ai isi atigipusa o boots leaga o loo faaputu i fafo o le ofisa.
Fai mai Mirkana, e tumau pea lona fiafia e tafao mai i Samoa ma o le a ia faaauau pea ona asiasi mai i nisi o aiga Samoa ua ia faauo i ai, ma ta’u o ona aiga Samoa, ae o le a ia lē toe mafai ona ia toe vaai nisi oloa e aumai pe foai mai mo tagata Samoa.
A’o lei aumai le pusa oloa lenei i Samoa na fesiligia foi le tamaitai leoleo poo iai sana faatatau i le puipuia o le siosiomaga, i le taimi e uma ai le aogā o seevae nei.
O lana tali, e lei iai sona mafaufau i le itu lea, ae o le a tilotilo i ai i le lumanai.
Ma o lona faamoemoe o iai, i lana tala i lea taimi, o lona manaoga, ia toe faaputuputu foi isi seevae mo le isi pusa i le taimi oi luma, faatatau i le uma ai o le aogā o seevae ua tapena mai.
Peitai o lea ua ia toe folafola, lona faagata o lea foi ituaiga o fesoasoani.
