O le faalavelave lea na maliliu ai tagata lotu Musalimi i Kalaiasetete Niu Sila, ua fesiligia ai le taitai o le atunuu, Tuilaepa Lupesoliai Sailele Malielegaoi, i popolega e faaono tulai mai, poo lava tapena Samoa, i ni tagata faatupu faalavelave, e faaono ulufale mai i Samoa.
O le saunoaga a le Palemia, mo Samoa lava ia ua leva ona iai i Samoa nei, tagata faatupu faalavelave faapea, ma o ia tagata, ua lauiloa lea i lo latou faatupu o le ita ma le faia o faaupuga soona lafo, ma i’u ina faatupu ai le vevesi i totonu o aiga ma nuu.
O le fautuaga a le Palemia i alii ma faipule o nuu ma afioaga, ia mau pea le toovae, ma ia tausi pea ma faamamalu i tatou tu ma aga i fanua, e tau taofiofi ai uiga leaga ia ua alia’e mai i le atunuu, e faatupu ai le ita, ae faaaogā ai fesootaiga televavave.
E lē o manino i le saunoaga a le Palemia poo ai tonu lea e faasaga i ai lana saunoaga, peitai, na faaaogā e le palemia le faataitaiga o ia, e lafo uma i ai le mau tuua’iga lē faavaea, ae maualuga lona talitonuga o loo agai le taumafai e aveese le faigamalo.
O le taumafai e faatupu le ita i tatou tagata ona omai lea ua influence tatou tagata, e unaia le omai e latou te pulea le malo.
“A silasila lelei i talaaga o tagata nei, e te maua ai uiga leaga nei, e fetaua’i o latou aiga, toeitiiti tauaimisa i aso uma, e malepelepe o latou aiga, e malepelepe ulugalii, atoa ai ma isi uiga matagā o loo o latou faia.”
Saunoa le Palemia, o se faataitaiga lelei lava, ina ua toai atu ia te ia se fesoasoani a se tasi o aiga, ina ia tutuli atu leoleo e tau faafilemu se tasi o latou vesiga, ae foi atu leoleo, faailoa atu ua fiu leoleo e faafilemu, ma na toetoe lava ina faaaogā sapelu e fetaua’i ai.
O tagata foi ia na faaalia e le Palemia, e o faamaopoopo tagata ua faatetea ma nuu, ona o lea ua fai latou nuu, e faaaogā ai le aiātatau, ma le malosi e tautala ai i upu e lē malamalama ai.
O tagata foi nei o loo lalafi mai i tua le aiātatau, ae o loo solitulafono i le faatupu vevesi i totonu o aiga ma nuu.
O ituaiga tagata foi ia ua faapogisaina o latou mafaufau ma ua lē ano lava i ni vesiga e faaono tutupu i totonu o latou aiga e tusa ai ona o tuua’iga sese ua latou faia.
Na saunoa foi Tuilaepa o lana matau, e toafa lelei isi faipule o loo lalafi i tua o OLP. Ua na matauina foi, e tutusa lelei le gagana o loo faaaogā e OLP, ma le gagana a le isi alii faipule ua leva ona o latou faifai mea faatasi, ma o loo soifua pea. “Ou te iloa lelei e masani a tagata nei, e o sue tagata sa faipule muamua ona taumafai lea e aumai i fafo faamatalaga e fai agai i ai a latou tusitusiga faasaga mai i le malo ona faapea lea o le a dignify ai le latou feau.”
Na faamanatu e le Palemia upu a le Tusi Paia lea e faamanino mai ai agasala e fitu aupito sili ona inosia, e pei o le mata faasiasia, laulaufaiva pepelo, lima e masaa ai le toto, loto manatunatu i togafitiga leaga uma lava, o vae televavave e taufetuli ai i le leaga, molimau pepelo ma le faatupu o maseiga i le va o uso.
E pei ona silafia ma malamalama, o loo tau saili pea e le malo, poo ai tonu tagata ia e lalafi i tua i le itulau a le “O le Palemia poo le OLP”.
O faamatalaga foi o loo tusia i le OLP, o loo tuua’ia ai le palemia i le faia o uiga piopio, o tuua’iga o le gaoi, aemaise o nisi o faiga piopio o loo tuua’ia o loo faia i totonu o matagaluega a le malo.
Ua toatele foi tagata, ua iloga ona aafia i lipoti a le OLP, e oo lava i amioga o loo faia e nisi na maua avanoa e malaga ai galue faavaitaimi i Niu Sila, ua vavane uma i luga e le OLP.
O ituaiga tagata ia lea o loo faavae agai i ai le saunoaga a le Palemia, o loo lalafi i tua i ni igoa sese ma le lē sa’o.
E oo mai i le taimi nei e lei maua le tagata e ana le itulau ua faaigoaina o le OLP.
